عذراً ، لن نصمت

طبعا من حق الدنمارك وغيرها أنها تعمل اكتر من كده..لما يتسب الرسول صلى الله عليه وسلم فى صحيفة واحدة قبل كده ويبقى رد فعلنا اننا قعدنا هاديين ونقول بكل بساطة ومودة تعالوا نعمل حوار حضارات.. ولازم نبعت ثقافتنا وديننا للآخر عشان حضرته يعطف علينا ومايشتمش النبى تانى.. يبقى عندهم حق ان كل الصحف الدنماركية تنشر الرسومات تانى..لأننا كالعادة هنقاطع البضايع الدنماركية يومين..ونشتم شتمتين..ونستنى اعتذار منهم وطبعا الاعتذار مش بييجى..ويعدى الأمر وكأن شيئا لم يكن
وطبعا احنا المصريين الشعب الوحيد اللى هيرمى كل حاجة ع الحكومة ونزعق ونقول نلغى اتفاقيات التجارة واستيراد البضايع دى..الناس كلها فى كل الدنيا هيه اللى بتقاطع وهيه اللى بتعمل الدور الإيجابى واحنا هنا كل حاجة نرميها كعادتنا على الحكومة
لو كل واحد فينا قاطع البضايع دى واترمت فى السوق .. الشركات مش هتستوردها تانى من غير ما تقول لى اتفاقيات وكلام فاضى.. محدش هييجى يضربك على إيدك ويقول تعالى اشترى دنماركى..ومحدش هيشدك من شعرك اللى انتى صابغاه ومظبطاه بمنتج دنماركى ويقول لك تعالى اشترى
يعنى الواحد من دول يطلع يعمل أجدع مظاهرة عشان نصرة النبى ويشتم فى الدنمارك وهوه الصبح فاطر قبل ما يروح المظاهرة جبنة دنماركى!!
ياجماعة تعالوا نعمل مرة واحدة ف حياتنا حاجة إيجابية من غير ما نقول حكومة ولا حوار حضارات.. نخسرهم الأول و نخرب اقتصادهم وبعدين تعالى قول لى بعدها حوار حضارات بقى براحتك..انت يعنى لما تقف قدام ربنا وقدام شفيعك النبى صلى الله عليه وسلم هتقول مقدرتش اعمل حاجة والذنب على الحكومة؟؟
وطبعا عايزين ياجماعة المقاطعة ان شاء الله تبقى بلا رجعة.. مش مجرد يومين وخلاص..عشان مش كل واحد عايز يولعها يشتم فى النبى وييجى يعتذر واحنا نبوسه من بقه وخلاص..ونقول له معدتش تعمل كده تانى!!
عايزين كل دولة تعمل حاجة زى دى تعرف ان اقتصادها هيتخرب وصادراتها للشرق الاوسط كله هتبوظ..الناس دى مالهاش دين أصلا.. وهمهم الفلوس والمصلحة.. تعالوا نحاربهم بسلاحهم وبلاش نحارب كل الدنيا بسلاحنا احنا: الحضارة والثقافة والحوار!!
بقى بيتبص لنا على اننا شوية كلمنجية وفنجرية بق..والله منظر المولات السعودية والإماراتية وهيه شايلة البضايع الدنماركية وعاملة يافطة مقاطعة حاجة تسر القلب.. وخللوا بالكم اللى عامل المقاطعة برضه مش الحكومات.. دول أصحاب المولات والزباين هما اللى عملوها ودول كلهم أفراد وماستنوش رد الفعل الحكومى
شاطرين بس كل واحد مننا واثق فى ربنا وعارف ان النصر لينا فى الآخر وكلنا حافظين حديث آخر الزمان لما نقاتل اليهود ويبقى الإسلام هو الأعلى.. وناسيين ان ربنا اشترط ان احنا الاول نبقى عبيد لربنا وننصره بجد
شايف نفسك عملت حاجة لربنا؟؟دعيت مرة وانت بتصلى ان ربنا ينصرنا ويذل الدنمارك وغيرها؟؟ رحت مرة تشترى جبنة لقيت دنماركى مجبتهاش مش عشان غالية .. لأ.. عشان نيتك انك بتنصر دين ربنا؟؟
مش عايز اطول المرة دى ولا اكتب بوست جديد.. حبيت اشارك ولو بكلمة.. ياريت كلنا نشارك ياجماعة واللى بيعرف يعمل بانرات يعملها قاطعوا الدنمارك.. وتبقى لينا احنا كمدونين..وكلنا نكتب وندعى ونقاطع وبجد أنا واثق ان أى حد مهما كان مذنب ومهما كان عاصى.. فكلنا بنغلط ونعصى ربنا وبيغفر لنا بعد التوبة.. عارف ان رغم كل ده الا اننا كلنا بنفور من جوانا عشان نصرة النبى
ودى ياجماعة قايمة بالمنتجات الدنماركية
http://www.islamway.com/mohammad/ar/?page=dkproducts
مارضيتش أجيبها هنا عشان عايز كل واحد يعرف اسم المنتج وشكله كمان فى الجدول..عشان احنا أساسا بناكل من غير ما نقرا الحاجة دى منين.. ان شالله من كوالالمبور
أنا عارف أساسا ان معظم المنتجات الدنماركية معداش علينا..عشان الجبنة الدنماركة غالية أصلا.. واحنا آخرنا جبنة من المثلثات.. وبنقول للبقال يقسم كل مثلث لمثلثات كمان.. وبنلحس السكينة قبل ما نمشى.. بس برضه يمكن حد منكم وللا من القراء اللى الحمد لله متابعين البلوج فى الدول العربية أو برة الوطن العربى يكونوا متعودين عليها حاشا لله
ربنا ينصرنا جميعا
فى انتظار دعمكم من اجل رسولنا محمد
( صلى الله عليه وسلم )

محمد رسمى 2008

ايه الحلاوه دى يا ايو رسمى والله بجد موضوع جامد

لا حياة لمن تنادى
وفر الحبر

اصلا احنا اكبر اساءة للرسول

بنفاقنا وتخلفنا واخلاقنا الى احنا فيها دى

الرسول الله هينتقم له

لكن احنا غير مؤهلين لندافع عن الرسول ابدا

لندافع عن الرسول لازم

بجد نغير مجتمعنا مش بس مقاطعة

او ناخد موقف لازم نصحى نفسها ونرجع لدينا

واهم حاجه نعرفهم يعنى ايه اسلام ومين محمد

شكرا رسمى

شكرا على موضوعك الجمييل....بس انا كان ليا تعليق على الحته دى: لما يتسب الرسول صلى الله عليه وسلم فى صحيفة واحدة قبل كده

ويبقى رد فعلنا اننا قعدنا هاديين ونقول بكل بساطة ومودة تعالوا نعمل حوار حضارات.. ولازم نبعت ثقافتنا وديننا للآخر عشان حضرته يعطف علينا ومايشتمش النبى تانى

ربنا قال "يايها الناس انا خلقناكم من ذكر وانثى وجعلناكم شعوب وقبائل لتعارفوا ان اكرمكم عند الله اتقاكم"

يعنى احنا الواجب علينا انا احنا نتعرف ع الاخر ونعرفه بنفسنا برضه.....

طيب حط نفسك مكان الدنماركى ده او اى حد ما سمعش قبل كده عن الرسول ....ما يعرفهوش بجد....كل اللى عارفه عنه من خلال
الاعلام اللى مش بيوصلهم الصوره الصحيحه.....

انا شايفه ان احنا بدل ما نهاجم واحد جاهل بحقيقه ديننا ان احنا نعرفه الدين صح....وهو حر بعد كده يقتنع او ما يقتنعش....بس احنا هنكون عملنا اللى علينا..
انتوا عارفين ان فى حكايه الدنمارك دى اسلم ناس كتير من الغرب بعد ما راح الدعاه وعرفوهم الدين ده ايه بالظبط....فبتهيقلى انها كانت مفيده حوارات الحضارات والثقافات......
وعلى فكره الدعاه اصلا كانوا منقسمين لرايين ...راى مع الحواار ده وراى ضده...بس انا عن نفسى مع راى الحوار....
فداك روحى يا رسول الله....

صلى الله على سيدنا محمد و اله و صحبه اجمعين
عندك حق يا رسمى بس احنا هنقاطع المنتجات ازاى و هى جوة مصر اصلا ماخلاص اللى اشترى اشترى
شكرا على مجهودك الرائع

يص يا رسمى
انا فى كلمة واحده سمعتها ومن ساعتها انا مقتنعه بيها كدا
كان عمر خالد بيقول ان رسولنا الكريم لو كان موجود عمره ماكان هيرد الاساءه بالاساءه كان فى ادله كتير اوى هوا قالها
تانى فعلا حاجه انا متفقه مع نودى جدا
فيها ايه لو نعرفهم احنا مين بهدوء وبساطه ليه حرب او مقاطعه او الكلام دا كلوا
هى اقولك ممكن المقاطعه كاسلوب سلمى
وبعدين زى مانت قولت المنتجات الدنماركيه مش شغاله اوى يعنى
فهو احسن حاجه هى حوار الحضارات

انا بعد ماشفت القائمه بقى
والله تانى ولا اعرف ولا واحد فيهم
ولا هتلاقيهم فى المنيا اصلا
غير بسيط جدا جدا جدا

شكراً يا مدحت شيتوش دى حلاوتك انت والله
وبقول لآبو شعبان
ليه السلبيه دى بس ، تعرف انت لو بس اقتنعت بكلامى بس ومعملتش اى حاجه ، ده كفايه عليا انى قدرت اوصل فكره ، لآ مش انت يا ابو شعبان اللى تقول كده
انا مقتنع بكل كلمه قولتها يا فله ،
وعندك حق ، بس هل المفروض اننا نقعد نوحش فى نفسنا ونقعد ندور على اسباب نفسر بيها وضعنا ، لآ طبعاً ، انت عارف ايه اللى بجد مش عاجبنى فى زمانه ده ايه هو ؟ ان كل واحد فينا وفى الدنيا دى فاكر انه لو عمل حاجه صح انه يبقى الشخص الوحيد اللى عمل الحاجه الصح دى وميكملش وهكذا ، تعرف برضه ايه اللى خلى اضراب سته ابريل اللى فات يطلع بالشكل اللى احنا شفناه باستسناء المحله ، ان كل واحد قعد فى البيت فعلآ وكان ناوى الاضراب بجد ، وحس ساعتها انه لوحده ، عمل كده ، قايم قال لنفسه اما اشوف الشارع شكله ايه وهو فاضى ، وكل واحد يعمل كده وتلاقى الشارع اتملى ولا كأن فيه اضراب عام ولا دياولوه
ياريت اللى يعمل حاجه يكملها وبدل ما يثبط نفسه ، لآ ، يشجع نفسه ويشجع اللى حوليه ، وربنا معانا
وبقول لنوودى هو احنا هنستنى اساءه وبعدها نتكلم ، طب مكنش فيه حوار حضارات ليه من الاول قبل الاساءه، ده لآننا نستنى اللى يهزئنا وبعدها نتحرك
وبقول لانجل
عليك الصلاه والسلام يا حبيبى يارسول الله
ماشى اللى اشترى اشترى ، طب واللى لسه مشتراش هيشترى ولا لآ هيه دى المقارنه
ولما محدش هيشتريها البائع مش هيطلبها تانى والعمليه تخلص بقى
وبقول ل مى
ومن منطلق ان الرسول صلى الله عليه وسلم مكنتش بيرد الاساءه بالاساءه وعارف انه لما كان اكفار بيرجموه بالحجاره كان بيدعى ربه اللهم انى اشكو اليك ضعف قوتى وقله حيلتى وهوانى على الناس ، مع انه كان ممكن يدعى عليهم بالمكروه ودعاءه مستجاب ، بقول وهو ايه اللى عملناه اساءه اصلا ، طب ده حتى سكوتنا ده اكبر اساءه ، بس مش ليهم ، لآ ، لينا
وبأيد كلامك ان الحوار يكون بهدوء وبساطه ليه لآ ، ده بأعتبار ان المقاطعه شىء سلمى ولا حد ممانع؟؟
انا بس فتحت الموضوع ده دلوقتى علشان اوريكم ان كل واحد مننا مش بيتكلم لما بيتهزء عرفتى يا مى ويا نوودى

اخر الكلام
سلااااااام