مواصفات البنت المصرية

الصفة الاولى: التناكة..

البنت المصرية العادية تعتبر اي ولد يحاول التكلم معها، تعتبره مجرما أثيما يحاول التقرب إليها لسبب خبيث حقير شرير ألا وهو التعرف عليها.. إلى أن يثبت العكس!!

لا حول ولا قوة إلا بالله!!

يعنى لو شاء القدر في الكلية عندك خاصة لو كنت في ( ألسن) واضطرتك الظروف إنك تكلم واحدة مش من شلتك أو بينكم صديقة مشتركة, فلا بد أن تكون لك ما يكفي من المبررات والأسباب الكافية جدا, كي تقنع سيادتها إنك لست ذئبا بشريا،و انك لا تسأل عن موعد المحاضرة كمقدمة لسبب آخر لا داع لذكره،عشان العيال الصغيرة اللي بتقرا الموضوع معانا!!

هل لديك زميلة في كليتك من جنسية أخرى؟ لا حظت بتتكلم معاك عادي إزاي كإنك بني آدم خلقه ربنا؟ عادي يعني .. انما لما تيجي تتعرف على بنت مصرية لازم تتكتك وتخطط وترسم الخطط والاستراتيجيات وكإنك داخل على موقعة حربية.. فيه إيه يا عم؟؟ على إيه ده كله يا إكسلانس؟

الصفة الثانية: الشياكة

البنت المصرية (بحق ربنا) تتزين وتهتم بمظهرها بشكل لابأس به إطلاقا (روح سيتي ستارز، مش باتكلم على معهد الصنايع اللي جنب بيتكم يا خفيف!) ..

المشكلة هنا هي نظرة البنت نفسها للمسائل دي ..

البنت دي في الأغلب والأعم بتعمل الشويتين دول لتجذب الشاب الغلبان إللي هايتدبس يا عيني.. وبعد الجواز بقى انت عارف اللي فيها!!

على الرغم من كده فيه بعض الخبراء في هذا الموضوع بيأكدوا إن الجيل الصاعد بتاع اليومين دول، فيه أمل كبير قوي وممكن يغير الحته دي.. مين عارف .. مفيش حاجة قليلة على ربنا!

الصفة الثالثة: احتقار الراجل!!

فيه راجل رحالة قديم جه على مصر في العصور السحيقة ..لاحظ سلوك الستات في مصر وكتب عنه.. بيقول الراجل ده في مذكراته فيما معناه:

"...... وحين جئت أرض مصر، وجدت فيها أمرا عجيبا مستغربا, ألا وهو تسلط نسائها على رجالها..!! عجبت لهذا الأمر عجبا عظيما، وانتويت سؤال أولى العلم في هذه المسألة الغريبة.. فجائني رجل بالسبب:

حين خرج فرعون لملاقاة موسى، خرج ومعه كبار القوم وسادتهم، وتركوا النساء والعبيد.. فلما حدث ما حدث وهلك فرعون ومن معه ..اتخذت النساء عبيدهن أزواجا!.. ومن هنا جاء تسلط نساء مصر على رجالها حتى اليوم, فهم يعاملونهم كالعبيد......"

شايف القصة المهببه دي؟ اهو الراجل مش من هنا وقالها بنفسه.. بتعملوا فينا كده ليه يا نساء مصر اتقوا الله فينا مش كده.. دا حتى عشان سمعة الوطن في الخارج.. يرضيكم اللي بيتكتب ده يعني؟؟

نعمل إيه طيب؟؟

بعد ما شفنا البنات بيتعاملوا معانا ازاي يا شباب.. لازم نعد العدة ونتعامل معاهم بنفس الأسلوب.. خد الحلول دي وظبط نفسك:

الحل الأول: المساواة ..في الظلم عدل!!

زمان كانت الست المصرية بتحارب عشان حقوقها .. دلوقتي لولا الكسوف بس كان الرجال عملوا جمعية لمناصرة حقوق الراجل.. مش كده؟؟

لاحظ كده لو كنت بتركب المترو أو الأوتوبيس .. سيب بس أي بنت حلوة لابسة ستوماك بادي تدخل وشوف إيه اللي هايحصل.. هاتلاقي شاب كده هلهولة عامل جنتل مان راح قايم ومقعدها مكانه .. وغالبا البنت هاتنزل آخر الخط ومش هاتقوم، عشان تخليه واقف أطول فترة ممكنة!

النصيحة التي أتحمل مسئوليتها الكاملة هي: لو لقيت بنت حلوة عايشة الدور, داخله المواصلة اللي انت راكبها إياك تقوم وتقعدها مكانك.. أولا: صحتها أحسن من صحتك ميت مرة (بطل السجاير بقى عيب انت كبرت!) وثانيا: هي مش من بقيت أهلك (لو اختك أو خطيبتك اللي داخلة ماتستهبلش يعني!), وثالثا: لو عامل كده عشان تبين لها انك واد جنتل يعني وحنين، فاعرف إنها مش هاتخليك تتعرف عليها يا ناصح حتى لو عملت لها قرد..يعني هاتبقى قمت ووجعت رجلك عالفاضي.. ومش هتاخد ثواب كمان عشان نيتك غالبا مش كويسة! رابعا: البنت دي مش كبيرة في السن وشابة زيادة عن اللزوم زي مانت شايف.. تقوم ليه بقى؟؟ طيب لو هي اللي قاعدة وانت اللي داخل كانت هاتقوم لك؟؟

المفروض تقوم وتقعد البنت اللي واقفة في الحالات دي:

لو لقيتها بنت غلبانه أو بنت محترمة أو فتاه عاملة أو ست كبيرة، يبقى لازم تقوم لها طبعا مش عايزة كلام.. لكن لو بنت من اياهم، تبقى شاب مش تمام ،لو قعدتها مكانك!

الحل التاني: ولا تعبرهم! سألت مرة بنت: " انتي بتلبسي ليه كده؟"

اجابت: "عشان كده أشيك!"

فلحوا عليها في السؤال تاني عشان يعرفوا الإجابة الحقيقية (رزالة بقى!) فقالت في النهاية بصراحة:

- "عشان الناس تبص عليا وأحس إن أنا حلوة!"

شفت بقى يا معلم؟ يعني البنت من دول عامله اللي هي عاملاه ده عشان كل ما انت تهتم بيها، سيادتها هاتتكيف وتنبسط أكتر.. ومش هاتعبرك برضه يا عم الدون جوان..!

أقول لك حاجه؟

و لا تعبرها .. لو زميلتك عاملة كده يبقى احلقلها ميري يا معلم.. نفضلها وسيبها .. يعني لو بتكلمك وموبايلك رن, رد عليه وسيبها وامشي... لو واحدة ماشية في الشارع كده،لا تبصلها ولا تعبرها ... كإنها هوا معدّي.. كإنها لاشئ عابر!

لعلمك الحركة دي بتجننهم جدا جدا فوق ما تتخيل .. لأن البنت من دول متعودة ان الناس بتطلب رضاها ومعجبة بيها طول الوقت.. خلي كرامتك بقى تنقح عليك ونفضلها وش ..و لا تبصلها يا شقيق.. بيّن ان انت مش عبيط زي الناس التانية وان الحركات دي ماتخيلش عليك..

هاتلاقيها اشتعلت نارا واتفحمت.. أحسن .. تستاهل!

وتحية كبيرة لزميلاتنا المحترمات
النموذجيات في كليتنا الحبيبة

هههههههههههههههههههههه
والله انت تحفه يا ياسر
للعلم انا هابلغ عنك البنات فى الكليه وان شاء الله هايغتالوك قريب

لأااااااااااااااااا بليييييييز بلاش
وأنا مش هكتب عن الحاجات دي تاني

طول عمر ولادك يا السن رجالة Twisted Evil

شكراااااااااااا ياعم ياسر مكنش العشم

التناكة
اكتر حاجة موجودة بالفعل
ربنا يشفى كل مريض
شكرا يا يااااااسر

AL_Administirator كتب:: هههههههههههههههههههههه
والله انت تحفه يا ياسر
للعلم انا هابلغ عنك البنات فى الكليه وان شاء الله هايغتالوك قريب

زي وا مي قالت
هنوريكوا يا شباب التناكه
علي حق

ماشى ياياسر
احنا فعلا هنغتالك قريب

انا يا جماعه خلاص اشتريت طاقية الاخفى
علشان مواضيعي هتسببلي مشاكل في الكليه
وانا لازم اختفي Laughing

الصراحه الموضوع جامد جدا يا ياسر بس حرام عليك والله مش كل البنات كدا وعموما بردو مواضيعك جميله وربنا يوفقك يارب

وعلى ايه بقى التحيه الى فى الاخر دى
دانت بهدلتنا
على العموخم شكرا يا عم ياسر

أكيد طبعا توتي مش زعلانه

وياريت Prinzessin برده متزعلش

وشكرا على الردود

برافو عليك يا

ياسر على فكره كل ده صح تسلم ايدك يا يسّور

اشطه يا sweet bird

ههههههههههه حلوة يا ياسر
بس اكيد مش كل البنات كدة
روحوا شوفوا نفسكوا الاول الولد لما يشوف واحد منكم بنت حلوة بيعمل ايه

على فكره ولا بيعمل حاجه
بينفض أو بيشتغلها شويه Laughing

شوف ياسر انا موافقاك يعنى انا مثلا مش عرفاهم

بس انت مزودها حبتين ياراجل

شكررررررررررا

يا فله لا مزودها ولا حاجه

هي دي الحقيقه