بعد التخــرج .... بيجي التشــرد !!!

طابور طويل عريض... ماشيين فيه كلنا ... لابسين البالطو والكاب
الإسود... وورانا أهالينا واصحابنا وكل حبايبنا... اللي بيزغرط واللي
بياخد كام صوره في اليوم العالمي ده واللي بيعيط من الفرحة ومش مصدق إننا
خلاص كبرنا ودي طبعًا "ماما".لأ وماشيين كمان وقدامنا زفة حسب
الله... هو المشوار مش بعيد من السلم لحد القاعه بتاعت الاحتفالات ... بس المشوار اللي مشيناه في حياتنا لحد ما وصلنا لليوم ده هو
اللي كبير وطويل فعلاً... 5 سنين ابتدائي على 3 اعدادي على 3 ثانوي وآخرهم
4 أو 5 جامعة... المهم إننا في اليوم ده وفي نهاية المشوار الطويل في
الدراسة من ابتدائي للجامعة القصير في المشي من السلم للقاعة... !!!هناخد ورقة من الجامعة بتقول إننا إتخرجنا.... وهي في
الحقيقة بتقول إننا خلاص مبقاش لينا قعاد في الجامعة... بيني وبينكم هو
طرد بس بشياكة.... طول عمرنا من أيام المدرسة وهم دايمًا بيقولولنا
المدرسة بيتكم التاني ولما كبرنا شويه وسبنا المدرسة بقت الجامعة بيتنا
التاني... لأ وأحيان كتير بقت الجامعة بيتنا التالت والرابع كمان...في
ناس كانت بتروح الجامعة عشان تتعلم وتاخد محاضرات وامتحانات، وفي
ناس تانية كانت بتروحها عشان هي النادي بتاعها فبتروح تشوف أصحابها وتقعد
معاهم أو يعملوا أنشطة يخرجوا فيها الطاقات الكبيرة اللي عندهم أو يقابلوا
أشخاص هم بيحبوهم، المهم إن كل الناس إللي كانت واخدة الجامعة جد أو اللي
كانت واخدها فسحة بقي عندهم فراغ كبير بعد ما اتخرجوا... وناس كتير منهم
حسوا إنهم اتشردوا.بعد الجامعة الأيام بقت مختلفة... ومختلفة جدًا
كمان... بالنسبه للولد والبنت... يمكن لأسوء يمكن لأحسن... حسب الظروف...
بس عادةً اللي بيحصل إن البنت بعد ما بتتخرج- ده طبعا ف حالة عدم الحصول
على وظيفة- بتقعد جنب ماما تتعلم كل حاجة عن البيت خصوصًا وإن الحجج بتاعت
المذاكرة أيام الجامعة خلصت خلاص !!أما الولد بقى فحالته
حالة... لأن أهله بيتحملوه ويتحملوا مصاريفه أيام الجامعة على أمل إن هو
لما يتخرج يشتغل... فلو مشتغلش بيسمع كل ساعتين كلمتين في جنابه.... لإنه
مش بس المفروض يلاقي شغل لكن المفروض كمان يعمل أي حاجة ما تخليهوش يقعد
في البيت زى البنات كده... !!المهم
إن الحياة بعد التخرج ناس كتير بتشوفها وحشة... لأنهم بيعتقدوا إن النهاية
في التخرج.... وعلى فكرة كلامي اللي مكتوب فوق ده بيحصل للناس اللي بتبقى
حياتها في المذاكرة وبس... مع إن الحياة مش كده خااااااااالص.... وبجدبعد
التخرج بيكون عند الواحد أكتر من اختيار... هتقولوا لي إن احنا بنتخرج
عشان نشتغل... طب ولو ملاقيناش شغل... نعمل ايه يعني؟!! نحط إيدنا تحت
خدنا ونقول ما هو ده حال كل الناس وكل الشباب مش لاقي شغل... لأ وإيه في
ناس كمان بتقول يللا نهاجر... طب وبعد ما تهاجر هتلاقي الشغل... والا
هتلاقي يعني الخضرة والوجه الحسن هناك؟!! Absolutely وعلى رأي المثل "من
خرج من داره إتقل مقداره"...مش عارف بس أنا بأشوف، ودي وجهة نظر
شخصية... إن الحياة بتبتدي بعد التخرج... عارفين ليه؟!! لإن الواحد أيام
الجامعة بيكون كل تركيزه على المحاضرات والأبحاث والتكليفات
المطلوبة منه... ويا سلام لو هو مشترك في نشاط أو مثلاً بيمارس رياضة
وعنده بطولة فالتركيز بيكون مضاعف لإنه لازم يعمل كويس في المذاكرة أو على
الأقل يظبط نفسه إنه يعدي ولازم كمان يعمل كويس في الحاجة التانية اللي
عنده جنب المذاكرة... يعني من الآخر مش بيكون شايف قدامه...لكن بعد
التخرج بيكون عنده وقت كبير... ناس كتير أول ما بتتخرج بتعمل دراسات عليا
ماجستير يعني.. ده كويس بس هم عادة ما بيفكروش قبل ما بيعملوا ده وما
بيدوش نفسهم فرصة عشان يفكروا أصلاً... لإن المفروض الواحد بعد ما يتخرج
ياخد على الأقل كام شهر يقعد فيها مع نفسه... يرتاح من المذاكرة ويحس إنه
اتخرج فعلاً وما بقاش عنده ضغوط المذاكرة والامتحانات ويفكر بقى برواقة هو
عايز يعمل ايه؟!! لإنه مثلاً ممكن يكون عاوز يشتغل في حاجة غير اللي درسها
في الكلية خالص... وهنا هيبدأ يتعرف على الحاجة الجديدة ديه ويحاول ياخد
كورسات فيها... وممكن قوي يشتغل في حاجة بعيدة خالص عن دراسته ومع ذلك
يلاقي نفسه فيها ويحب يطور نفسه أكتر... فيبقى لازم لو هكيمل دراسات عليا
يكمل في نفس مجال شغله عشان يستفيد من الدراسة في الشغل وما يكونش مخه
مشتت لإن الشغل في ناحية والدراسة في ناحية تانية خالص...ده لو
احنا بنتكلم عن حد هيكمل دراسات عليا بعد التخرج... أما بقى لو حد مالوش
في المذاكرة أصلاً... وبدأ يدور على شغل فلازم يا جماعة الواحد يجرب كل
حاجة... ما نقولش أصل أنا خريج كلية الألسن ودراستي في المجال اللغات
فما أقدرش اشتغل في حاجة تانية... الشغل مهما كان صغير أكيد الواحد هيتعلم
منه... وحتى لو ما إتعلمش منه فهو أكيد هيتعلم من الناس اللي هيشتغل
معاهم... مهما كانت الوظيفة اللي قدام الواحد فهو لازم يروح ويجرب... ما
حدش عارف؟!! يمكن يطلع بيعرف يعمل الشغلانة دي كويس وهو ما يعرفش... يمكن
يخرّب كمان بس محدش بيتعلم ببلاش ومفيش حد ما بيغلطش... واللي ما بيغلطش
ما بيتعلمش أصلاً...ناس تانية بقى بعد التخرج عملت حاجة أحسن من
الدراسات العليا والشغل كمان... حاجة هم بيحبوها وفي نفس الوقت مفيدة
ليهم... عارفين هي إيه؟!!... نموا مواهبهم... وما حدش يقولي أنا مش موهوب
في حاجة لأني متأكد إن كل واحد فينا بيتولد وجواه موهبة إدهاله ربنا يمكن
هو يكون عارفها بس مش مهتم بيها... يمكن يكون مش عارفها أصلاً... بس أكيد
كل واحد فينا عنده موهبة... عنده حاجة بيحب يعملها وبيعرف يعملها كويس

كمان... ...المهم إن التخرج مش نهاية المطاف... ومع إني كاتب
في الأول بعد التخرج ييجي التشرد... بس التشرد ده حالة طبيعيه للخبطة اللي
الواحد بيعيشها بعد التخرج... لكن المهم إن فترة التشرد دي ما تطولش...
ويلحق يقعد مع نفسه يشوف هو عايز يعمل ايه؟ وليه؟ وازي؟!! وأكيد... هيلاقي
إن حياته الحقيقية ممكن يبدأها وبإيده بعد ما يتخرج...

موضوع جامد جدا
وربنا يستر من التشرد

شكرا ليكي على المرور

هفتقدكوا مووووت و ربنا

بس ربنا يا رب يكرمكوا و يوفقكوا و يكتبلكوا كل خير ف حياتكوا

و يرزقكوا بوظيفة و عروسة اجمد من بعض

و نسمع عنكوا كل خير يا رب

و لسة الحياة قدااااااااااااامكوا

تسلم ع الموضوع يا ياسر

يااااااااااااا دى الحظ

بعد ما كتبت رد طووووووووووووويل عريض دوست على ايكون غلط راح

Crying or Very sad

بعد التشرد,,,,,,,,,يبدا النحس

بس هرجع واكتبه والله

Egypt
شكرا ليكي على كلامك شرفني مرورك

Fulla Flower
نورتي الموضوع ومستنين ردك

ميرسى قوى يا ياسر على الموضوع دة
بجد انا مخنوقة قوى والموضوع دة يمكن يدينى فرصة
علشان افضفض مع حد قبل ما اطق او اعمل حاجة فى نفسى
انا زهقانة قوى ومش لية نفس اعمل اى حاجة
حاسة انى كبرت عشر سنين ومش عارفة اعمل اية
مع ان الفترة اللى خدنا فيها الاجازة يومين بس
بس حاسة انى لية سنة قاعدة فى البيت
ومخنوقة ان فى ناس عمرى ما هشوفها تانى
وخلاص القرار فى كل حاجة فى حياتى بقى ليى لوحدى
وانا اللى هختار فخايفة قوى من الاختيار دة
ربنا يكرمنا كلنا والفترة دى تعدى على خير

pirat

والله يا doby دا حالنا كلنا ... حالة حزن رهيبة عندنا
عشان الأصدقاء والزملاء وأيام الجامعه اللي مش هترجع تاني
بس دي سنة الحياة ... وكان لازم يجي اليوم دا
أهم شئ أننا منفقدش الأصدقاء دول على طول ونفضل في تواصل معاهم

شكرا ليكي على المرور نورتي الموضوع

هاىىىىىىىىىىىىىىىىىىىىىىىىىىىى
الموضوع جميل لكن انتو بداتو مراحل الباكتئاب بدرى جدااااااااااااااااا
اسئلوا الخبرة
دا انتو هتعدوا ف البيت لحد مياخد من جتتكو رئات

وهيضيع صحتكم لحد متنسوا الاكتاب وتفضوا للعلاج من امراض الفراش

ياساتر يا رب
بس اقولك انا حاسه بكل الحاجات دي
بل الاكتر وهو اني حاسه اني بلا هوية او مستقبل وشايفه كل حاجة قدامي كلها علامات اسنفهام؟؟؟؟؟؟؟؟؟؟؟؟؟؟؟؟؟؟؟؟؟؟؟؟
rabbit

يالهووووووي يا ناس
الموضوع قصده غير كدا خالص انا عايزك تفكروا ازاي تخرجوا من الملل والزهق اللي
بيجي بعد التخرج باقتراح افكار جديده ممكن غيركم يستفيد منها

ربنا يخرجكم من الاكتئاب دا

اقول عليك ايه يا ياسر جبت للعيال اكتئاب من موضوعك دا
حرااااااااااااااااااام عليك دا احنا فى انتظار النتيجه
وتانى حاجه ما احنا عارفين من قبل ما ندخل الجامعه اننا هنتشرد
ايه الجديد لازم تفكرنا ربنا يستر

اعتقد مفيش تشرد ولا الكلام دا انتوا بتفهموا الموضوع على عكس المطلوب منه
اللي عايز يشتغل هيشتغل
انصح الجميع انه يقرا الموضوع كويس

على فكرة احنا فاهمين قصدك
بس اللي جوانا طغى على اللي مفروض نعمله

واللة يا es geht
احنا كدة كدة مكتئبين ونفسيتنا زى الزفت
ومش احنا بس المنتدى كلة باين علية كدة
وياسر ادانا الفرصة اننا نتكلم قبل مانطق من قلة الكلام
ربنايعدى الفترة دى على خير
Crying or Very sad

انا اهو بعد سنة من التخرج
ومع انى لسة بكمل فى الكليه
الا انى لسة مكتئبة لحد دلوقتى
ولسة مفيش حاجة واضحة قوى قدامى
واصحابى وحشونى جدا
بس فى ناس يا خسارة ولا كانهم كانوا اصحاب
نسيونا وحتى رنة الموبايل بيستخسروها
وناس تانى احسن من الاول وكويسين جدا
وبيصونوا العشرة
ربنا يعدي اول ايام ليكوا دى بعد التخرج على خير
شكرا