لو في حد عنده مشكلة في الالماني يكتبلي

ازيكم كلكم في المنتدي الجميل ده
انا حبيت اساعد اي حد عنده مشكلة في الالماني او محتاج اجابة او استفسار فقولت اعمل موضوع مخصوص لو حد عايز
لو هقدر هساعده ان شاء الله واعذروني لاني مش دايما بدخل كل يوم بس هحاول دايما اكون معاكم
د. احمد حسن

والله يا دكتور انا في منتهى السعاده أن حضرتك موجود معانا في المنتدى
لأننا حسينا أن الحاجز الكبير اللي كان موجود بين الطلبه والدكاتره
تقريبا ماصبحش ليه وجود حالياً

وأحب أكون اول واحد يشارك و يطلب مساعده من حضرتك

لو انا مش قوي في الألماني ايه اللي ممكن اعمله عشان الحق نفسي واقف على رجلي
واحس ان الألماني بالنسبه ليا شئ عادي
يعني باختصار
يساعدني في التعامل في الحياه اليوميه والعاديه
مش الدراسه

وشكرا
Wink

بجد يا ياسر ده يسعدني اكتر منكم انا الحاجزمش موجود
بص يا ياسر اللغة عبارة عن كلمات وقواعد و تحدث
الكلمات ممكن الواحد يتعلمها من خلال القراءة بالالماني او ترجمة النصوص الالمانية
التحدث ممكن بينكم او معانا او مع المان و انا اتكلمت مع مي علشان نعمل يوم كل اسبوع نتكلم فيه بالالماني مع بعض انا وانتم و هنرتبه ان شاء الله
القواعد كلنا عارفنها بس الاستدام الحقيقي ليها هتراجعه كويس لما تعمل الحاجتين الي انا قلتهم

يعني أفهم من كلام حضرتك
أن أهم شئ الكلمات وبعديها التعامل مع الناس عشان التعود واستخدام الكلام

طيب هل في ازمنه معينه الواحد المفروض يعتمد عليها
بمعنى اخر لو واحد عايز يتعلم لغه تانيه عشان يستخدمها في السياحه مثلا
ايه القواعد او الأزمنه اللي هو يركز عليها قوي عشان يستخدمها في الكلام بس

اهم الازمنة هيا المضارع و الماضي ويجي بعدهم perfekt
اهم القواعد هي nominativ, akkusativ, dativ والافعال و الحروف الي بتيجي معاها
هو الموضوع يبان صعب جدا في الاول بس الواحد لما يتشجع و يتكلم و يغلط و بعدين يتعلم من الغلط بتاعه مش بيكرره
وحدة وحدة الغلط بيقل لحد ما يختفي

د.احمد حسن
انا سعيد جدا انى بكلم حضرتك
انا اسمى محمد 3 إرشاد سياحى
الحقيقه انه فيه مشكله عندنا فى كليه السياحه ان دكاتره الألمانى من كليه الألسن اللى بيدرسو لنا مش بيهتموا بينا خالص
لدرجه اكاد اجزم ان مستوى اللغات عند طلبه سياحه وخاصه الألمانى ضعيف جداااا
ومحاضرات كتير بتتلغى من غير سبب مش عارف ليه
هل يعقل يا دكتور ان محاضره الألمانى الفرقه التالته تتلغى ببساطه ووقتها الاقى الدكتور بيتفرج فى معرض الألمانى فى سوزان مبارك وسايب محاضرته ؟
يعنى انا بطالب ولو بنص اهتمام دكاتره ألسن اللى بيبزلوه مع طلبه ألسن مع طلبه سياحه
شكرا يا دكتور اتحت لنا الفرصه دى اننا نتكلم مع حضرتك ونقول رأينا بصراحه واتمنى ان رأيى يوصل لدكاتره الألمانى فى كليه الألسن
danke

شكرا لحضرتك على التوضيح

اهلابيك يا محمد 3 ارشاد في المتتدي
انا عايز بس اقولكان مش احنا الي لغينا المحاضرة يوم المعرض
دي تعليمات جاتلنا من عندكو انتو علشان تروحو المعرض

شكرا على متابعه حضرتك
بس يا دكتور حضرتك اتكلمت على جزئيه واحده من تعليقى
لو نتكلم على مستوى طلبه سياحه مقارنه بطلبه ألسن بالنسبه فى اللغه حقيقه مقارنه ظالمه لطلبه سياحه
على فكره مش برمى الحمل على دكاتره ألسن ولا بشيل سبب المشكله دى عن طلبه سياحه
لكن اعتقد انها مشكله تتعدد اسبابها ما بين لايحه تدريس واهتمام دكتور وطالب علم
بمعنى انه لو اتكلمنا على اللايحه هنقول ان إمتحان الألمانى نظام اخر السنه فقط
ودا بيخلى الدكتور و الطلبه مش بيهتموا بالمحاضرات الترم الاول مقارنه بالترم التانى
ومدى اهتمام الدكتور بمادته وحضور محاضراته بينعكس اكيد على الطلبه
فى الترم الأول عملنا بحث عن عادات وتقاليد الشعب الألمانى لما ناقشناه كان بالإنجليزى دا لآننا مش متمكنين من الألمانى
اسف لو كنت طولت بس هى دى الحقيقه .. تقبل مرورى .. شكرا

كلامك صح بس ده لان الطلبة عندنا عندهم مواد كتيربالالماني وانتو مادة واحدة
الطالب في اي حته لو عاوز يتفوق اكيد هيلاقي طريقة او حد يساعده
وعلى فكرة لو انت بتحضر هتلاقي انك مثلا في 3 هتتوزع عليكم نصوص بالاماني على الاثار السياحية في مصر علشان تعرف الي انت بتتعلمه بالعربي في تخصصك ولكن بالالماني
وده علشان بنحاول ترفع من مستوي الالماني بتاعكم بس انتم لازم تكوتو مستعدين لده علشان تستفادو بيه

دا حقيقى فعلا لما اتكلمت مع عميد الكليه عن المشكله دى

قالى انه بيحاول يخلى نصوص الألمانى فى إرشاد غير سياحه غير فنادق

بالنسبالى حابب الألمانى جدا ومتحمس انى اتعلم بجد

لدرجه انى اوقات لما ببقى فاضى بحضر سكاشن ألمانى مع زمايلى سنه رابعه ألسن

الحمد لله فى سنه اولى جبت جيد جدا وفى تانيه جيد

بس حاسس انه لسه محتاج كتير فى الألمانى

Danke

لو عايز تقوي نفسك اكتر من الدراسة تعالالي المكتب و انا هساعدك

لو في حد عنده مشكلة في الالماني يكتبلي Dohaup_2087596734

السلام عليكم د.احمد

يمكن انا فى سنة رابعة وخلاص بنودع الكلية

بس انا عندى حاجات حصلت لنا فى رأيى انها ضيعت على وقت

اننا نتعلم حاجات اكتر فى الالمانى

1-تكرار المناهج

بمعنى انى باخد حاجة فى سنة رابعة وانا اخدتها فى تالتة وتانية كتير

فليه نكررها تانى كنا ممكن ناخد حاجة تفيدنا اكتر

والمشكلة ان المناهج المتكررة دى بندرسها فى ترم كامل

حتى الطالب وهو بيذاكرها بيحس انه مش مستفيد

ممكن حضرتك هنا تقولى احنا بنعطيها لكم واحدة واحدة

يعنى اكيد الى بتاخدوه فى تانية مش زى رابعة

هقول لحضرتك طيب ومادام هى صعبة ليه ما ناخدها فى رابعة مرة واحدة ونخلص

لان العملية كلها اربع سنين واكيد مش هناخد كل حاجة لكنها عشان قصر الوقت

مش مستاهلة انى اعيد وازيد فى حاجة واحدة

2-انا بس عايزة ارد على محمد واقوله

انك مهما درست فى الكلية مش هتاخد الالمانى كله

وان التعلم الحقيقى انك تطور نفسك بعد الكلية

3-دكتور بجد شكرا لانك اتحت لينا فرصة كبيرة نعبر عن رآينا بصراحة

وبجد شكرا لان حضرتك مهتم بقسمنا جدا وده حاجة تحسدنا عليها الاقسام التانية

طبعا من خلال المعارض الخاصة بالالمانى فقط

لو في حد عنده مشكلة في الالماني يكتبلي Dohaup_2087596734

اولا احب اشكر حضرتك واحيك على الخطوة الجميلة دى.انا شايفة انه اكبر مشكلة عندنا اننا نتكلم المانى ,كتير من الدكاترة بيقوللنا نتكلم مع بعضنا وكده بس الحكاية دى مش بتنفع يعنى بنعقد نتكلم جملتين او تلاتة وبعد كده بنقلب عربى انا عندى فكرة ليه ما يكنش فى عندنا مادة محادثات زى قسم انجلش بيتهيقلى انه المادة دى هتقوى عندنا اللغة يبقى فيه ولو ساعتين فى الاسبوع محاضرة نتكلم فيها فى مواضيع عامة بالالمانىبما انه دخول المعمل اصبح نادرا او مفيش خالص .عندى سوال لحضرتك هو الواحد لو عايز يقوى نفسه فى ..الترجمة وخصوصا من عربى لالمانى..يعمل ايه؟

اولا يا فلة موضوع الاتكرار ده غالبا بيكون صح للاسف وده بنحاول نقلله مع الوقت ويمن انتي ملاحظة ده مؤخرا
بس ساعات بنقصد ده علشان الاستفادة تكون اكتر في مواد معينة

بالنسبة لورة او blume للاسف اللايحة مش بتسمح لينا اننا نعمل ده لكن انا اتفقت مع مي اننا نعمل ساعة حرة المانية علشان نتكلم مع بعض بالالماني
وبعدين انا عملت اعلان هنا علشان نعمل شات بالالماني كل يوم جمعة معاكو علشان تستفيدو وكنت بدخل وملقتش ولاواحد موجود وعايز يتكلم للاسف مش عارف ليه
اول حاجة علشان تتعلمو ترجمةمن العربي انكم تحسنو مستواكم في العربي
مش معقولة تعرفو تترجمو كويس و العربي بتاعكم وحش وانا اكتر مشكلة بتقابلني في تدريس الترجمة ان الطلبة مش عارفة تفهم النص بالعربي ينفع ده؟

سلام عليكم

ازيك يا دكتور احمد

انا هند مع حضرتك ف تالتة الماني

و بالنسبة للشات الالماني يا ريت لو حضرتك بس تقلنا المعاد بالظبط

و احنا اكيد هنبقي موجودين

و بالنسبة لاننا مش فاهمين النص العربي دة بيبقي اما سؤ مستوي مننا ف العربي

او سؤ اسلوب من النص نفسه

بس ف كل الاحوال حضرتك مشرفنا و منورنا بجد

ارجو ان تتقبل مروري يا دكتور

مرسي جدا يا هند على مرورك
اتفقو انتو مع مي على ميعاد يناسبكم وقلولي عليه و بعد كده نعلن الميعاد تاني في المنتدي

خلاص ان شاء الله

و احنا شاكرين مجهود حضرتك معانا

و انا كان ليا سؤال ف الترجمة

لو مثلا ف النص الالماني مكتوب الكلام بلهجة عامية

هل لما نيجي نترجمه للعربي نكتبه بردو بلهجة عامية

و لا نخلي كله فصحي ؟

كل سنة وحضرتك طيب يا دكتور

وشكرا جدا على اجابتك الصريحة

وان شاء الله ربنا يوفقك ويوفقكم جميعا فى القسم

بس انا كان فى مشكلة تانى ومشكلة انا متاكدة ان محدش هيعرف يحلها

يا دكتور بجد انا مش عارفه اذاكر واكتر من انى مش عارفه اذاكر انى ببكى كتير جدا

عشان المشكلة الى عندى اصعب من ان اى حد يعرف يحلها

ةهى انى خلاص بودع احلى كلية شفتها وبودع احسن دكاترة واحسن ناس

بجد يا دكتور يعنى المسالة دى ماثرة فيا جدا

صعبان على اوى ان الاربع سنين كانهم شريط ذكريات مش اكتر

بتمنالكم التوفيق طول العمر

اسف على التاخير في الرد
لما بنترجم نص عامي بنحاول تكون الترجمة برضه عامية وبرضه ده حسب النص العام
مشكلتك يا فلة مالهاش حل
بس على فكرة المشكلة دي بتقابلك مرة واحدة في سنة رابعة
احنا بتقابلنا المشكلة دي كل سنة لما نودع لبة حلوين زيكم
بس اكيد هنتواصل

اسمحلى يا دكتور انى اشترك معاكم فى الموضوع ده
طبعا ببدأ كلامى بانى احييى حضرتك على المجهود اللى بتبذله علشان تنفعنا احنا كطلبة
وربنا يوفقك يا رب وتفيد طلبة المانى كلهم ويوفقكوا كلكو فى القسم
تانى حاجة احب اتكلم عنها
هى اخر حاجة كاتباها فلة فلاور
بس انا كان فى مشكلة تانى ومشكلة انا متاكدة ان محدش هيعرف يحلها

يا دكتور بجد انا مش عارفه اذاكر واكتر من انى مش عارفه اذاكر انى ببكى كتير جدا

عشان المشكلة الى عندى اصعب من ان اى حد يعرف يحلها

ةهى انى خلاص بودع احلى كلية شفتها وبودع احسن دكاترة واحسن ناس

بجد يا دكتور يعنى المسالة دى ماثرة فيا جدا

صعبان على اوى ان الاربع سنين كانهم شريط ذكريات مش اكتر

موضوع انك بتبكى كتير ده اساسا مش مشكلة علشان تعرضيها وتدورى على حل ليها
وانتى واثقة انه مفيش حد هيعرف يحلها زى ما بتقولى
هى فعلا احلى كلية وحلى ناس واحلى فترة وكل حاجة حلوة
بس اكيد مش هنقف عليها ولا هنقعد نبكى
وزى ما قلتلك انتى مش عندك مشكلة اصلا علشان تقولى عايزة حل
انتى بس متأثرة شوية بنهاية مرحلة وبتفكرى فى اللى جاى كتير
زمان كنت دايما اقرا جملة كده بتقول
لا تفكر فى الامر كثيرا بل دع الامر لمن بيده الامر
واكيد ربنا شايل لكل واحد فينا حاجة احسن فى مستقبله
ممكن نشوف ناس احلى ونرتبط بناس ارتباط اقوى وهكذا وربنا قال
انا عند حسن ظن عبدى بى
اما بالنسبة لباقى الناس احب اوضح حاجة
المستقبل مجهول ودايما اكتر حاجة يخاف منها الانسان المجهول
لان الخوف منه دا شئ فى طبع الانسان
فى ناس بتتكلم كتير اوووووى فى موضوع اخر سنة والكلية والاصحاب
ساعات بحس ان فى ناس منهم خايفة تواجه المستقبل
على فكرة انا خايف من المستقبل
وبخاف من المجهول زيى زى اى حد تانى
والخوف منه مش عيب
العيب ان الواحد يعلق كل حاجة فى حياته على النقطة دى ويقف عندها
انا خايف من المستقبل اه بس جبان لا
انا خايف منه وهواجهه وانا واثق انى هعمل حاجات كويسة
خايف من المستقبل ومستبشر بيه خير
خايف من المستقبل بس مطمن لان ثقتى فى ربنا مش ليها حدود
اتمنى ان الناس كلها تخاف من المستقبل بس تكون عندها الشجاعة وتواجهه
علشان الشجاع اللى بجد هو اللى يبقى خايف من حاجة وبرغم كده يواجهها
والاصحاب بقى والكلية والدكاترة الكويسين اللى ربنا يكرمهم
والكاترة اللى طلعوا عنينا حبتين عن طيب خاطر
ربنا يهديهم ويكرمهم برده
كل ده مرحلة وخلاص جابت اخرها وقربت تخلص
شئ جميل اننا نفكر فى اللحظات الحلوة بس الاجمل
انى اسيبها وانا واثق ان فى لحظات احلى هتعدى عليا
وبس
سورى للاطالة وتقبلوا مرورى
ومرة تانية ميرسى ليك دكتور احمد

السلام عليكم د.احمد
والله منور المنتدى
انا سنه رابعه المانى وكان عندى اسئله بخصوص الترجمه النظرى
1. ما المقصود ب Abgrenzung des Aequivalenzbegriffs
وهل التعريف المذكور بها يختلف عن تعريف ال Aequivalenz العام؟
2.انواع التكافؤ عند كولر و كونج هل هى انواع عامه للتكافؤام تخص هذين العالمين فقط؟
3.عند تعريف التكافؤ هل نذكر التعريف العام فقط ام نذكر التعريف العام + النشأه+اراء العلماء
وشكرا ليك د.احمد حسن flower

seito
بجد كلامك جامد قوى
انا لو عندى نص الايمان اللى عندك دة
مكنتش تعبت فى حياتى
ولا وصلت لدرجة الاكتئاب دى
بجد ربنا يكرمك

ميرسى لكلامك دوبى
وربنا يكرمنى ويكرمك
ويخرجك من حالة الاكتئاب اللى انتى فيها

انتي مكتئبى ليه يا دوبي؟