قولوا لى اعمل ايه؟

انا عندى مشكلة كبيرة
هى مشكلة عاطفية
المشكلة ان كان فيه واحد فى الكلية بيحبنى اوى اوى وعشان حبه ليا واهتمامه وخوفه عليا انا حبيته
لكن فجأة حسيت انى مش بحبه
او لما بتكلم معاه بحس انى بحبه
اول ما اسيبه او اقفل سماعة التليفون بحس انه عادى وانه مش فارق معايا فى حاجة
بالرغم اننا لما كنا بنتخانق كنت ببقى عايزة اموت نفسى وكنت ببكى كتير اوى وانا دموعى غالية عليا
وبسأل نفسى طيب انا كده لعبت بيه ولا دى حالة وهتعدى ولا ايه
انا مش عارفة اعمل ايه بجد وهتجنن يا ناس
انا اخر قرار اخدته انى اسيبها للظروف وللنصيب
يعنى نظام انى لو نصيبى معاه ماشى ولو مش معاه يبقى محدش بياخد اكتر من نصيبه
احب اعرف رأيكوا فى المشكلة دى

بص يا ياسر اولا هو قابل اهلى بس لوحده وهو اكيد هيتقدم رسمى بعد حوالى سنة من دلوقتى وهو بيحبنى بجنون وانا لو خسرته هبقى خسرت خسارة كبيرة عشان كده انا قلتلك انى هسيبها للنصيب ولو نصيبى معاه انا مش هكره ده وحتى لو انا مكنتش بحبه وان حبى ده مجرد اعجاب باهتمامه بيا اكيد ممكن اكمل معاه لانى شايفاه انسان كويس اوى ليا حتى لو مكنتش بحبه الحب اللى هو حقيقى اوى ده كفاية ان فيه قبول واعجاب

والله انا رأيى انك لازم تقعدى مع نفسك وتقررى تكملى معاه ولا لا
عشان انتى كده بتظلميه
وطالما هو بيحبك بجد مفتكرش انك عايزة اكتر من كده
وانتى قلتى انك لما بتكونى معاه بتحسى انك بتحبيه
يعنى لو كملتى معاه هتحبيه اكتر واكتر
اسمعى نصيحتى
متخسريش انسان حبك بجد
وربنا يوفقك

والله هو موضوع محير محدش للاسف ممكن يساعدك غير نفسك شوفى انتى عايزه ايه وليه
و هو ده الانسان اللى انتى بتحبيه و الا لا ونصيحه البنات المفروض ما تحبش غير اللى يتجوزها
عشان تريح اعصابها و وتبقى بريئه فى مشاعرها مع الانسان اللى هيتجوزها و تحبه بجد
لو الانسان ده اللى بيحبها اتجوزها يبقى كده تمام و تكون ضربت عصفورين بحجر واحد

بصى انا مش عارفه اقولك ايه بس مادام انك قعدتى تفكرى
بس لمجرد التفكير انك بتحبيه ولا لا تبقى مبتحبيهوش
اظن انك لو بتحبيه هتبقى حسه بده قوى
انت ممكن تحتارى فى اول العلاقه اذا كان ده حب ولا
لكن بعد فتره اكيد بتقدرى تحددى

انا بشكر كل واحد فيكم اهتم بيا وبمشكلتى وانا هحاول اقعد مع نفسى وافكر
اما بالنسبة لسؤالك يا ياسر هو قايل لاهله عادى وهما موافقين بس هو لسه طالب ومستنى يلاقى وظيفة كويسة ويتقدم لانه مينفعش يتقدم رسمى دلوقت وهو معندوش وظيفة
واللى فيه خير يقدمه ربنا

موضوع محير جدا
بس انت الوحيدة اللى هاتقدرى تحكمى بنفسك ولازم تقعدى مع نفسك وتفكرى كتير لان دة مستقبلك شوفى اذا كنتى بتحبية ولا لا شوفى مميزاتة اية و طبعا ماتنسيش صلاة الاستخارة وبعدين معنى انه قابل اهلك يبقى هو كويس ومحترم
وربنا يوفقكوا

انا يا ميوى فعلا صليت استخارة واللى لقيته انه انسان كويس
بس المشكلة فيا انا
انا بسبب التردد وزى ماقلت انا مش عارفة انا عايزة ايه
مش عارفة اقرر
اكمل ولا لا
عايزاه ولا لا
بحبه بجد ولا لا
عشان كده انا متضايقة من نفسى انى مش قادرة اخد قرار فى حياتى
خصوصا دى حاجة مصيرية
مش اى حاجة يعنى
انا هحاول افكر كويس واقعد مع نفسى وهشوف اكمل ولا لا
وشكرا لاهتمامكم