فرق السن

فرق السن

طبيعي جد اننا نعرف ناس اكبر او اصغر مننا في السن فالحياه يا ما نشوف وبتبقى العلاقات دي لها اشكال كتير
زي الصداقه او الزماله او الحب..... في مشكله من كده.... اكيد في مشكله
بتظهر مشكلة فرق السن في اختلاف وجهات النظر واسلوب التفكير والمزاج الشخصي والي بتاثر جدا على استمرار العلاقه بين الناس
انت ممكن تصاحب حد اكبر منك وتستريح في التعامل معاه اذا كان تفكيرك اكبر من سنك لكن انت ممكن تتعب جدا اذا صاحبت حد اصغر منك في السن وفي التفكير وبتلاقي انه في وادي وانت في وادي تاني خالص مع العلم ان الحب والاخلاص موجودين لكن ناقص الكميا المشتركه والتفاهم
في شيلل اصحاب كتير جدا ومعظهم في فروق في السن بينهم لكن كل ماقلت الفروق دي كل ماكانت العلاقه ناجحه ومستمره اكتر والفروق دي من سنه ل تلات سنيين بالكتير
اوقات لما الناس بتتقابل وبيحصل في قبول وراحه نفسيه لبعض مابيفرقش موضوع فرق السن ده ومحدش بيفكر فيه اصلا كل واحد بيحاول يجي على نفسه شويه عشان يرضي صحبه والحكايه بتمشي
لكن بتحصل بعد كده مشكله ان كل واحد بيبقا عايز ياخد التاني لدنيته هو بتلاقي انه لو اصغر منك في السن بيحاول وبدون قصد ينزلك لسنه وانت بتحاول بشكل لا ارادي تطلعوا لسنك ومستواك وده بيسيب اثر سيئ في نفوس الناس وبيكون مع طول الوقت رواسب بتخلي العلاقه تبقى مستحيله فيما بعد مع انهم بيبقو بيعزو بعض لكن باديهم ممكن يخسرو بعض دي طبيعة النفس البشريه
في مثل شعبي بيتكلم عن الي يمشي مع العيال مايخلاش من ..........ده مووروث شعبي قوي بيتكلم عن شكل وظروف تجربة فرق السن بيين الاصحاب او الناس الي انت ممكن تتخذهم اصحاب ليك وايه الي ممكن تتعرضله من مشاكل في التجربه دي على فكره دي مش مشكلة فرق السن بس دي مشكلة الناس نفسها انها بتنجرف ورا مشاعرها بدون تقدير صحيح للموقف وبدون تفكير سليم ومحدش بيسئل نفسه هل انا ينفع اصاحب الناس دي ولا لا
طب الي يمشي مع الكبار يحصلو ايه اكيد في ملل واكيد هيحصل فتور في العلاقه انت بتبقا لسا في حاجات في الدنيا لسا ماعشتهاش ولا شفتها ممكن تحس بشيء من القيود على تصرقاتك ومشاعرك وانت مصاحب حد اكبر منك في السن والتفكير
كل مرحله في الحياه ليها اصحابها وليها ناسها وليها شخصياتها الي بنقابلها وبيتوقف استمرار العلاقات
على فرق السن لان ممكن نفترق لمجرد اني خلصت مرحله في حياتي قبل التاني او رحت لمرحله جديده في حياتي مفيش فيها أي وقت لاصحابي
بس لكل قاعده شواذ طبعا وفي علاقات كتير فرق السن فيها كبير ونجحت واستمرت واكيد في امثله على كده
لكن بنرجع لنفس المشكله الي بتمثل الاغلبيه فرق السن في العلاقه اسباب نجاح واسباب فشل اكيد مننا الي مر بيها او حد قريب ليه عاش تجربه من دي
تعالو نتكلم ونشوف اسباب النجاح واسباب الفشل

اولا : بشكرك علي الموضوع دة

ثانيا : انا شايفة ان فرق السن مش مهم قد التوافق في المستوي الفكري
يعني اهم حاجة في العلاقة اللي قدامي التوافق في المستوي الفكري
طبعا انا مش هقعد اشوف كل حد بتعامل معاه متوافق معايا فكريا و لا لأ[
الموضوع دة هشوفه بس مع الناس المقربين ليا يعني لااااااازم يكون في توافق
فكري بيني و بين الناس القرين ليا

كمان في نقطة تاني و هي توافق الصفات
يعني انا مثلا ممكن اعرف حد فيه بيني و بينه توافق فكري و كل حاجة بس صفاتنا متلفة
يعني ممكن انا مثلا اكون شخصية قيادية و هو بردو كدة في الحالة دي صعب اننا نكون مع بعض
رغم ان تفكيرنا واحد و المستوي الفكري اللي بينا تمام

و اكيد ان في الاغلب السن بيبقي ليه علاقة بالمستوي الفكري بس في عصرنا دة
بقي الكستوي الفكري مش بيتحدد بالسن
انت ممكن تلاقي واحد في ستة ابتدائي و مخة و مستوي تفكيره و لا واحد في جامعة

يعني الخلاصة ان اهم حاجة التوافق في المستوي الفكري و الصفات الشخصية

و بشكرك علي موضوعك دة يا جرين

طبعا موضوع مهم جدا ياجرين
وانا عن نفسى اكتر الناس الى برتاح اتكلم معاهم
اكبر منى بلاقى بيفهمونى وبيستوعبونى بسرعة
ممكن تقول هروب من الى فى سنى
لانى ملاقتش فيهم الى يعرف ينقذنى وقت ماكون فى مشكلة
جربتهم اكتر من مرة
انا بحب الصحاب الى اكبر منى
اكيد هما هيفدونى بتجاربهم الاكتر فى الحياة
وانا كمان ممكن الجا للاصغر منى
اذا وجدته فاهمنى وفى بينى وبينه شبه فى التفكير
هى بالنسبة ليه مش مشكلة خالص
شكرا جرين

أنا بقى بالنسبه ليا موضوع فرق السن مش بيشكل أي مشكله عندي
كتير بلاقي ناس أكبر مني سناً ومستوى التفكير عندهم ولا واحد في اعدادي
وناس كتير أصغر مني سناً وتلاقي تفكيرهم ما شاء الله تحس أنك بتكلم واحد أعلى منك سنا وعلما وفكرا

يعني موضوع فرق السن مفيش منه أي مشكله لأن أهم شئ بالنسبه ليا التوافق الفكري
أو التقارب الفكري لأن ده بيكون مريح للطرفين جدا جدا

وشكرا على الموضوع

هاي ايجبت اشكرك طبعا
بس في حاجه معقول طالب يكون في سته ابتدائي وعقله ولا واحد في الجامعه
عموما مفيش حاجه غريبه اليويمن دول

بس انا بيتهيقلي الي قريب منك في التفكير اكيد هيبقا قريب في الصفات
لان الصفه هي الي بتوجه العقل وهيا الي بتحددله اسلوب التفكير
يعني ممكن يحصل تواصل
بس على فكره المتشابهين في الفكر والطموح في الغالب مابيحصلش بينهم استقرار
لان هنا بيحصل سباق ومنافسه ممكن تتحول
لكن المختلفين بس على نفس الطريق في الغالب بيستقروه
طبيعة الانسان مابيقبلش الشبيه ليه ولا المتميز عنه لكن ممكن يبقل المختلف
ولا ايه

فلة وردة المنتدى

اكيد ممكن ترتاحي مع حد اكبر منك زي منا قولت اذا كان تفكيرك اكبر من سنك
واكيد هتلاقي في الحياه الي يصلح كصديق بجد
بس في نقطه معتقدش ان الحل الي استخدمه حد في حل مشكلته
يصلح مع شخص تاني
يعني قد تكون الاستفاده من تجارب الاخر مجرد الحذر مش اكتر
لكن مش هنقدر نطلع من التجارب دي حلول منطقيه تنفع مع تجاربنا الخاصه حتى لو كانت في نفس الموضوع
ولا انتي رايك ايه

اشكرك يا ياسر

فعلا التوافق اهم شيئ ومعاه مابيفرقش السن ولا اي اعتبارات تاني

اكيد مش للدرجة يا جرين بس انا فعلا ساعات بقابل اطفال مخهم اكبر من سنهم بكتير اوي

و ساعات بقابل ناس كبار و ببقي انا اللي باخدهم علي قد عقلهم

بس انا بيتهيقلي الي قريب منك في التفكير اكيد هيبقا قريب في الصفات
لان الصفه هي الي بتوجه العقل وهيا الي بتحددله اسلوب التفكير

صح جدا و انا كنت عايزة اقلك كدة انت فهمتني يمكن انا مش قادرة اعبر بس كل اللي اقصده

ان ممكن واحد دماغة ناشفة و التناي نفس النظام لما يجو بقي يتعاملو مع بعض هيبقي في ازمة متهيئلي

دة كمان انا اقصدة

طبيعة الانسان مابيقبلش الشبيه ليه

صح جدا بردو بس الحل الوحيد في الموضوع دة

لو انا بحب الشخص اللي متشابة معايا بقدر يخلي حبي ليه يستوعب

علاقتنا يبقي ساعتها انا هتنازل عن حاجات كتير من صفاتي بس حبا في الشخص دة

يعني انا مثلا شخصية قيادية و حد تاني زيي كدة ببقي مش عايزة اتعمل معاه لو حبي ليه

اقل من المطلوب اما بقي لو بحبه جدا فحبي دة هيخليني الين شوية و اتفهم موقفة

و لا اية ؟

و بشكرك جدا يا جرين و معلش علي التطويل

لا ممكن طبعا ان الواحد يقدم شوية تنازلات عشان خاطر العلاقه سواء في الصداقة او الحب
تعيش وتستمر
لكن ده بيبقا لحد معين والحد ده مش معروف
يعني انا مقدرش احدد لحد فين اقدر اكمل واستمر و اقدم في تنازلات دي حاجه غير معروفه
وبتبقى تراكميه داخل الانسان يا توصل بيه لبر الامان يا تخلى العلاقه تفشل .

في حاجه كمان

انا ممكن من كتر حبي للانسان ده ممكن اكدب عليه

يعني مثلا يسئلني انت مبسوط اقول ايوه

مع العلم ان جوايا حاجه تاني خالص بس انا اضطريت اقوله كده عشان ماجرحوش او اتعبه اكتر في حكايتي معاه
او ممكن اكون عايز اديله فرصه تاني من غير مايحس .... ممكن

ولسا في باقي