هي مش كلمه صايع كانت شتيمة زمان ؟

هى مش كلمة صايع كانت شتيمة زمان؟؟!

حذرنا الكبار – واحنا لسة عيال – من خطورة أن نصبح ((عيال صايعة )) فعندما تتأخر فى العودة إلى المنزل بعد المدرسة يتم أستقبالك بسؤال ((كنت فين يا صايع لحد دلوقتى ؟)) وعندما يكون الزرار العلوى للقميص مفتوحاً ((ماتفتحش صدرك زى العيال الصايعة )) وكان هناك ارتباطاً وثيقاً بين الصياعة والتدخين والوقوف على النواصى ومعاكسة البنات ووضع الايدى فى الجيوب أثناء الكلام مع الاب وشرب القهوة ومتابعة المشاهد الساخنة فى الافلام والكلام فى التليفون بالساعات والرد على الكبار بأسلوب غير مهذب والتزويغ من المدرسة والرسوب فى نهاية العام .

وكأن لقب ((صايع)) لقباً مخيفاً نهرب منه (( وهو الواحد اية غير سمعة وشوية حاجات فوق بعض )) وكنا نحرص على الابتعاد عن أى شخص يحمل لقب ((صايع)) علشان الواحد ما ((يتشبهش)) .ولكن بمرور الوقت حدثت طفرة لم تعد كلمة صايع شتيمة بل اصبحت وساماً يضعه الاخرون على صدر كل من يحوز إعجابهم ولم يعد الصايع هو الشخص ((اللى مش متربى قليل الادب اللى بيسقط دايماً وقاعد طول النهار على النت وبيعلى صوتة على أهلة وبيسرق فلوس من ورا أهله علشان يجيب سجاير )) هذا الشخص مابقاش أسمة صايع بقى اسمة ((مغفل)).وأصبح الشخص الصايع هو الشخص الناجح القادر على أثارة إعجاب الناس من حوله الشخص القادر على أنتزاع تصفيقهم وأصبح ((الصايع)) هو النموذج والقدوة والمثل الاعلى أحيانا .ولقب ((صايع )) لم يعد أيضاً مقصوراً على الاشخاص فقط فهناك أشياء كثيرة ممكن تقول عليها صايعة جهاز الموبايل اللى فية كل الامكانيات اللى محتاجها واللى بتحلم بيها .. يبقى موبايل صايع .

ممكن تلاقى جون ((صايع)) عبارة عن جمله بين 3 لاعبين سريعة ورشيقة وغير متوقعة .

ممكن تشوف فيلم نهايته غير متوقعة ولما تمر فى خيالك تبقى نهاية صايعة والسيناريست اللى كتب الفيلم سيناريست صايع.

وممكن تلاقى بلد يتقال عليها ((بلد صايعة)) زى الصين اللى قدرت إنها تخترق مصر بمنتجاتها ويبقالها فى كل بيت مصرى 20 منتجاً على الاقل وبالتالى يمكنك أن تقول إن

((الصين دول صايعيين قوى )).

لم يعد لقب صايع مزعجاً مثل لقب ((عنده إيدز )) ولكن صايع أصبح وسام شرف مساو فى قوتة لوسام ال "iso 9001 "

ولا اعرف ماذا حدث بالضبط وغير سمعة الكلمة 180 درجة .. غالباً هى دى الصياعة !

أستطيع الان وأنا ضميرى مستريح أن أشجعك على أن تكون ((صايع )) بالمعنى الجديد للكلمة .. للصياعة بمفهومها الجديد

أداب يجب الالتزام بها حتى تستحق اللقب

1 . الصايع عمره مايقول على نفسة أنا صايع عمرك شفت واحد ذكى ماشى يقول للناس ((أنا ذكى يا جماعة )) ؟2 . الصايع يكرة الفهلوة لان الفهلوة سرقة ومجرد أستغفال للناس , الصايع يحترم ذكاء الاخرين .

3 . الصياعة تعتمد على الثقافة العامة فى كل المجالات يكفيك أن تعرف
((حاجة عن كل حاجة )).

4 . الحظ قد يقودك إلى القمة والصياعة أن تحافظ عليها .

5 . الصياعة أن بالك يبقى طويل وماتبدأش بالغلط وماتردش على اللى بيستفزك إنك تسامح الشخص اللى تقدر تنتقم منه بسهولة .

6 . الصياعة إنك ماتكررش نفس الغلطة مرتين .

7 . الصياعة إنك تدى كل واحد حقة وتعرف قيمة اللى قدامك بالضبط .

8 . الصياعة أنك تبقى فاهم كويس إنه - مش مهم إنك تغير الكون .. المهم إنك تخلى الكون ما يغيركش .

- الحب اللى بيجى بسرعة لازم يروح بسرعة .

- الاحمق هو الشخص اللى لسانة أسرع من عقلة .

- أستمتع بالحاجات الصغيرة بكرة هتعرف إنها كانت كبيرة .

- اتعلم تضحك على مشاكلك وأنت عمرك ما هتبطل ضحك .

- الخط المستقيم أقصر طريق بين نقطتين والابتسامة أقصر طريق بين شخصيين .

- الصبر .. هو الحاجة الوحيدة اللى لازم تستعجل وأنت بتتعلمها .

- وجودك فى الحياة هدية ماحدش يقدر يقدمهالك غير ربنا وفية ناس كتير بتيجى لهم هدايا قيمة الشاطر هو اللى يعرف يستفيد من الهدية اللى جت له .

- كل حاجة فى الدنيا فيها شئ جميل بس مش أى حد يقدر يشوفة .

- مش كل مرة تتعب فيها هتوصل للى أنت عايزة بس عمرك ماهتوصل للى انت عايزة من غير ما تتعب .

- الفهلوة سرقة .. خد بالك مفيش طريق مختصر للمكان اللى يستحق إن الواحد يروحه .

- حياتك فيلم واللى حواليك بيلعبوا أدوار الأب والأم والجار والصديق بس أنت بطل الفيلم .. حاول دايماً تتصرف زى الابطال.

- أخطر عيب فى البنى أدم إنه ما يشوفش فى الناس غير عيوبهم .

- الصديق الجيد هو الهدية الوحيدة اللى الواحد بيقدمها لنفسه بنفسه .

- الصديق الكويس هو اللى يبقى عارف كل عيوبك ومع ذلك بيحبك .

- أول خطوة فى النجاح إنك تعرف إنت عايز إية .

- ابتسامتك فى وش أى حد هتخليه صعب إنه يكرهك .

- مش مهم أن الناس بتحبك المهم أنك تحب كل الناس .

- عمرك ما هتعرف قيمة الميه من غير ما تعطش وعمرك ما هتعرف الصح من غير ما تغلط .

- مش أى هدية ينفع تقبلها .

- ماتسيبش الريموت كنترول فى إيد حد إلا لو كنت بتثق فيه.

- ماتصدقش اللى يقولك ((هى كده)) أو ((هى ما تتعملش غير كده )) كل الحاجات ينفع تفكر فيها من أول وجديد حتى لو قالوا لك دى ثوابت .. وخليك فاكر أن السباحة لو كانت بتخسس – زى ما بيقولوا – كان الحوت بقى سمكة زينة من زمااااان.

- مافيش حاجة اسمها حظ والمحظوظ هو مجرد شخص عارف هو عايز إيه وبيقدر يستغل كل الحاجات اللى بتقابله فى السكة لمصلحة الحاجة اللى هو عايزها .

- أوحش حاجة إنك تكون مابتعملش حاجة لأنة هيبقى صعب تعرف هتخلص أمتى .

- الوقت اللى هتضيعة فى التفكير فى الحاجات اللى نقصاك المفروض تديه للتفكير فى الحاجات اللى عندك .

- الخبرة هى الحاجة الوحيدة المفيدة فى الفشل .

- العقل زى الباراشوت .. مابيشتغلشى غير لما يتفتح

شكرا يا ياسر

للاسف هودا حال الدنيا

شكرا ياسر

mayoy
moustafa

thanks 4 ur reply

شكرا ليك ياسرررررررررررر

موضوع جميل

thanks rody

لا صايع نت يا ياسوووووووووور
وانا عندي اضافه بسيطه بس
الصياعة
الصياعة : أدب وأحيانا قلة ادب
الصياعة : فيها شيئ من شقاوه الاطفال وعبث المراهقين وطيش الشباب ,وحكمة الكبار
الصياعة : تهمة الآباء للابناء عندما يعودون الي بيوتهم متأخرين فينكرونها
وشرف لهم بين الاصدقاء يدعونه
الصياعة :موروثه ومكتسبة
الصياعة: خبرة وتجربة المجربين
الصياعة :تتميز فيها شعوب (الأمريكان- الطلاينة في أوروبا - المصريين واللبنانيين من العرب)
الصياعة:تختلف في تعريفها من الرجال الي النساء
الصياعة : تظهر في لمحة - حركه - جمله- نظره عين

الصياعة والمجتمع :

الصياعة: تحتاجها لتسلك طريقك في الغربه وتحتاجها ايضا عندما تعود الي مصر بعد سنوات من البعد عنها
الصياعة : بدونها لا تمشي امورك ولا تنتهي معاملاتك
الصياعة : تحتاجها للتعامل مع كل اشكال وطبقات المجتمع من أول سائق التاكسي حتي مديرك في العمل
الصياعة: أساسيه في البيع والشراء
الصياعة: صفة تبحث عنها بعض الفتيات في عريس المستقبل
الصياعة: صفة لا يتمناها الشاب في فتاة احلامة
الصياعة: يحتاجها دائما كل بلطجي بينما الصايع قد لا يحتاج للبلطجة
الصياعة : لا غني عنها لكل من يتولي منصب قيادي في اي مجال

الصياعة والتاريخ:

الصياعة: عرفت عن كثير من الشخصيات التاريخية بدءا من عنترة , وانتهاء بالملك فاروق والسادات
الصياعة: عبرت عنها قصص ونوادر وحكايات عبر التاريخ
الصياعة : في قصائد كثير من الشعراء من أول أمرؤ القيس حتي نزار قباني

الصياعة والفن :

من هو أفضل من قدم شخصيه الصايع علي الشاشه ؟
ما هو افضل فيلم عبر عن الصياعة؟

الصياعة وانا وانت :

متي بدأت تشعر بالرغبة في الصياعة ؟
متي بدأت اول خطواتك في طريق الصياعة؟
من هو استاذك في الصياعة ؟
من هو اصيع شخص قابلته واعجبت بقدراته الصياعية؟
ما هي اصيع حركة عملتها في حياتك ؟
ما هي اصيح حركة كنت شاهد عليها ؟

حلووو كلامك ياسر

وحلو كتير راي جرين هيرت

على رأي الأستاذ الكبير اللمبي
الصياعه أدب مش هز اكتاف Laughing

وانا عن نفسي عمري مكنت صايع
أو اتمنى اكون صايع بالمعنى التقليدي للكلمه

شكرا على اضافتك جرين
وشكرا على مرورك فله

موضوع جميل

دى رساله دكتوراه فى الصياعه......استفدنا منها كتيير......هههههههههههههههههههه

ميرسى كتيييييييير scratch

nilegirl
NOODY

شكرا على المرور