عظيمه يا مصر

بالصدفه البحته فى يوم كنت فى تدريب وكدا
وكان معانا عضو جديد معانا فى التدريب المهم بعد التدريب قاللى انا عايزك فى شغل تطوعى فى المركز بتاعنا
ا
قلت خير اللهم مااجعله خير وماله مافيهاش حاجه

فكان الشغل دا عباره عن اننا نمثل جمعية معينه وكاننا المتطوعين فيها من زمان
طبعا شغل الافلام العربى الى بيحصل دايما فى مصر
صحيت تانى يوم وتوكلت على الله وروحت على المكان الى اتفقنا عليه
طبعا علقنا الايديهات وبدانا نتحرك ولا كاننا متطوعين فعلا فى الجمعيه بقالنا سنين
احنا كنا بنمثل الجمعيه دى ادام كذا جمعيه من المنيا ومن المانيا
هتقوقولى هى المانيا فيها جمعيات تنمويه والكلام الفاضى دا
تصدقوا انا بردو كنت مستغربه
المهم
كانوا الالمان بقى عمالين يسئلونا وانتوا عارفين اختكوا ضليعه فى اللغه الالمانيه
لدرجة انى مانطقتش غير بكلمه واحده وهى
GUTEN MORGEN
طبعا يعنى زمايلى الى كانوا بيمثلوا معانا دور المتطوعين كانوا هيموتوا على روحهم من الضحك لانهم كانوا عارفين انى فى السن وفى قسم المانى
فقولت هى دى السن جامعة المنيا
لما كنت محتاجه اتكلم المانى ولا حتى عرفت اجمع كلمتين على بعض
الحمد لله طلعوا بيعرفوا يتكلموا انجليزى والحمد للله عرفت افهمهم واتواصل معاهم
اى نعم كان فى كلام كتير بيسقط فى النص بس مش مشكله المهم كنت بفهم المجمل العام
تصوروا بقى المفاجاه
ان المانيا فيها فقر
وفيها جهل
وفيها ناس بتلف على البيوت تعمل توعيه اسريه كدا زى مابيحصل عندنا فى مصر وايد مع ايد نبنى بيت سعيد والشعارات الهبله دى
تصوروا ان رئيس البرلمان فى المانيا عنده 17 سنه وتوراوا بردو انه بيشتكى من ان الشباب فى المانيا ماعندهمش وعى سياسي
الاغرب انه جاى مصر عشان يعرف ازاى يشجع الشباب على انهم يدخلوا العمل التطوعى السياسى
تصوروا ان احنا بقينا رائدين فى العمل التطوعى والتنموى لدرجة ان الالمان جايين يستفادوا من خبرتنا
طبعا انا ايه كنت هموت من الفرحه
اخدت دور العظمه وحطيت رجل على رجل وطبعا قعدت اتكلم عن عملنا التطوعى بس اتكلمت بوجه عام مش على الجمعيه الى انا بمثلها لانى ماتتطوعتش فيها اصلا
اتكلمت وحسيت بمدى فخر وعظمه وقيمة مصر
عظيمه يا مصر
والله على اد ماهى حاجه قليله بس فرحتنى اوى حسيت ان احنا لسه عايشين
شوفوا عشان بدانا نحاول
صوتنا اتسمع ووصل لبرا مصر كمان
كانوا بيقولوا ان مصر هتكبر وهتتقدم
الالمانيين قالولنا كدا
ادام فيها شباب زيينا
يااااااااااااااااااااااااه
بجد فرحت اوى
حسيت ان فى ناتج اهو للعمل التطوعى
مش وبس ولا هى تفاهه ولا هى هيافه زى مافى ناس كتير بتقولى
الحمد لله

ههههههههههههه

اكيد يا مى هما ناس زينا

بس ناس بيحبوا بلدهم

بجد احنا مش بنحب مصر وده بدليل

مثلا شوفى هما مخلين بلدهم لفوق ازاى

واحنا فى وضع لا نحسد عليه

حتى هناك شوارعهم نضيفة عندهم وعى

احنا شوفى شوارعنا هنبوس على ايد الناس بعد شوية

عشان ماترميش حاجه

اكيد مش مهم الوعى السياسى قد مامهم الوعى بحب الوطن

مثلا الامريكان اغلبيتهم ما يهتموش بوش بيعمل ايه بالعراق او كده

بس اهم حاجه الاتقان فى الشغل وبيفكوا صح من اجل بلدهم

شكرا ليكى يامى

بصى يا فله احنا لو مش بنحب بلدنا ماكناش هنسجل الرقم دا كلوا فى عدد المتطوعين وعدد الجمعيات التنمويه
ماكانوش ييجوا عشان يعرفوا مننا ازاى يحببوا الشباب فى بلدهم وفى العمل التطوعى
هناك البلد قائمىة على الحكومه وجهودها
ولكن هنا قايمه على حبنا لبدلنا ومحاولات تحسينها وتغييرها
يبقى البلد قايمه على افرادها
هناك فى اوروبا ماعندهمش اى اتجاه او اى مسئوليه ناحيه بلدهم
مرفهين لابعد حد
حبب البلد مش كلمه بتتقال
لا كل واحد جوانا حب لبلده بس مابيبانش عشان الظروف الى احنا فيها دى
بس بيبان فى مواقف معينه

مصر هتتقدم وهتكبر طول مافيها شباب زينا
ايه الجمله دي يعني
وايه الي خلاكي فرحتي اوي بيها
دي كلمة اعتباريه جدا وملائمه للموقف وخلاص ( تثبيت ) وبس
ومش الالمان الي هيجو يتعلمو مننا التتطوع
احنا الي محتاجين نتعلم
اذاي بقو قوة اقتصادية وصناعيه وعسكرية لا يستهان بيها في العالم كله
انتي الي هتخليني اقول على التطوع هيافه لو قارنا بحال المانيا وحال مصر
احنا هنا بنبي جيش من المتطوعين
وهما بيبنو اقتصاد وصناعه وقوه وشخصية وسيادة ونفوز وامان واستقرار
وحاجات كتير
انا طبعا مابصادرش على اتجاهك هو اتجاه يحترم
بس مش عايزين الامور تاخد اكبر من حجمها عشان
نعرف حجمنا الطبيعي
ومانفتكرش اننا عملنا معجزة
انتي فكرتيني لما مصر بتجيب جون
علاطول نلاقي الاغاني الوطنيه اشتغلت
وكاننا عملنا انتصار عسكري سياسي يحسب في تاريخ مصر
لا احنا اقل من كل الدول الي بيتجي تضحك في وشنا وتمشي
احنا خيبتنا ماوردت على حد
والله بجد ماوردت على حد
وعلى فكره العمل التطوعي
بدايته تبع مؤسسات عالميه من الخارج
يعني برضه الفكرة مش فكرتنا
واحنا مجرد شغيله
غير كده مين الفئة الي بتتجه للعمل التتطوعي
في مصر
اغلبهم معاندهمش مشاكل معندهمش حاجه تشغلهم
ناس فاضيه من الاخر
مع العلم انهم بيعملو خير بجد
يعني ناس مرتاحه من الاخر ودول قليلين

ماشى يا جرين
اعترف ان مشروعات التطوع دى جايلنا من برا بس مش هما الى شغلوها احنا الشباب الى شغلناها
ومين الى عطاك فكره ان المتطوعين دول ناس مرتاحين
لا خالص مش كلهم
انا عايزاك تنزل وتشوف جمعيات وشوف المتطوعين بجد ناس يصعبوا عليك
بس هما ناس عندهم امل فى بكره يحسنوه وهما يتحسنوا بالتالى معاه
ناس بيحبوا الله فاشتغلوا ليه وطمعانين انه يرزقهم
انا مابقاليش سنين فى العمل التطوعى انا دخلت فيه ييجى من شهرين بس مش اكتر
بس شفت ناس بتحب وتقدر بعض اوى
ناس مابينهمش صراعات
ودا طبعا مش كل الناس
بس الناس الى بتنجح ويتسمع صوتها اوى بتكون كدا
وبعدين هما مش جايين عشان يثبتونا يا جرين
والله والله انها كانت رحله علميه نزلاها جمعيات المانيه عشان يستفادوا من تجارب مصر فى العمل التطوعى
مااكنش تثبيت ولا حاجه وعجبتهم اوى فكرة حبنا لبدنا وان احنا بنشتغل من غير مقابل
ومشوار الالف ميل عادة بيبدا بخطوه
وعشان نبنى جيش وقوه اقتصاديه وعسكريه لازم اشباب يقووا الاول
ولازم يبقى عندنا ثقه فى نفسنا الاول والله احنا ماقليلين
ولو انت عايز تعرف هما بقوا قوه ازاى لانهم مش اكتر كل واح ابتدى بتنفسه وبالمجموعه الى حواليه وبدا يطورها وينميها
ابتدوا بالتنميه البشريه للناس وبعدها كل وواحد بدا يشتغل
يعنى احنا لسه فى اول مرحله يا جماعه اصبروا هنوصل بس السلم بيتاد واحده واحده
هما دلوقتى من كتر رفاهيتهم مابقاش عندهم عهمل تطوعى ولا حب ولا انتماء ولا كدا خالص فهم خايقين الاقتصاد والامبراطوريه الى عاملينها دى تقع
لذلك تاعبين نفسهم وجايين لحد هنا عشان يعرفوا احنا بنعمل ايه

هم يضحك وهم يبكي
ايه ده بالظبط
انتي قولتي جمله غريبة قوي
قولتي
هما دلوقتى من كتر رفاهيتهم مابقاش عندهم عمل تطوعى ولا حب ولا انتماء ولا كدا خالص فهم خايقين الاقتصاد والامبراطوريه الى
عاملينها دى تقع
ياسلام
وكمان جايين يتسفيدو من التجارب المصريه الرائده في مجال التطوع والتنمية البشريه
الله برافو
ده العمل التتطوعي في مصر وصل وبقا عالمي وانا مش واخد بالي
ولا حاسس باي نتيجه من نتايجه
خالص
ولا اي حد برضه غير ناس قليله
في بلد صغيرة في دولة فقيره
معقول في كده
تجربة العمل التتطوعي الي بتتكلمي عنها
كان المفروض تبقا مؤثرة وواضح لكل الناس
انتي هتقوليلي احنا على اول الطريق والكلام ده
اوكيه
يبقا نتكلم الكلام بتاع اول
الطريق

انتي ضحكتيني على فكره

نتايجه اقولك انا انزل شوف الاحياء الفقيره وشوف الاسر اليتيمه وشوف المدارس المتكسره والى كل دا اتصلح
انزل شوف الناس تحت
لان الجمعيات التنمويه بتبتدى بالقاع الاول
واه احنا لسه فى البدايه وبدايتنا قويه
لذلك سمعت على مستوى عالمى
بس كدا
مش اكتر يعنى

تمام
بالتوفيق انشاء الله

يارب دعواتك معانا

الموضوع كويس يا مي وشغال بس انا عايز اضيف حاجه الي حد ما بعيده عن الموضوع بتاعنا ان لما نيجي نتكلم عن اي حاجه في البلد او....او....او فياريت نبعد حكايه حبنا لمصر دي علشان دي حاجه تعتبر من الايمان بمعني اني في اسوأ الظروف ولو حصل فيا ايه هفضل طول عمري احب مصر بحلوه ومرها

كلامك طبعا صح بس
انا ماتكلمتش عن حب مصر يا مصطفى
انا اتكلمت عن تجربه عاديه جدا
بس فوجئت بردو دافعال ناس بتقول انها مابتحبش مصر اصلا وناس مشمقتنعه ببلدها افانا حبيت اوضح الفكره
ولو انت كنت اخدت بالك وركزت فى كلامى فوق
فى ردى على فله فلاور انا كتبت

(حبب البلد مش كلمه بتتقال
لا كل واحد جوانا حب لبلده بس مابيبانش عشان الظروف الى احنا فيها دى
بس بيبان فى مواقف معينه)

ان شاء الله ربنا هيصلح حال البلد دى بفضل مجهود ابناءها فى المستقبل ولازم نكون متفائلين

طيب انا هقولك علي حاجه
انت عارفه اني اللي بيقولك انه مش بيحب مصر ممكن ان لم يكن اكيد بيحب بلده اكتر من نفسه
لكن الظروف هي اللي بتحكم عليه يقول كده
علشان كده المفروض اننا نتحكم في الظروف مش الظروف هي اللي تتحكم فينا

طب مادا الكلام الى انا قولته فوق دا شئ معروف طبعا
حاجه طبيعيه جدا
بس المشكله ان اغلب الناس مابتفكرش بعقلها كتير وزى ماقولنا الظروف طبعا ليها عامل كبير اوى
ربنا يعيننا على الى احنا فيه