بيع قلبك...بيع كبدك...شوف الشارى مين؟؟؟؟؟

نشرت فة احدى الصحف

كتبت – آية رفعت

قانون بيع الاعضاء الجديد.. لو كنت ماتعرفهوش هو قانون بيناقش في مصر.. ويعطي الحق لأي مواطن أنه يمضي تعهد و عقد يسجل في الشهر العقاري أنه موافق يبيع اعضائه بعد وفاته و تستلم عائلته الفلوس اللي ح يبيع بيها.. ده غير انه ممكن يتفق مع حد محتاج لعضو ممكن يستغنى عنه في حياته أنه يبيعه له مقابل مبلغ من المال..
و بالرغم من أن الموضوع ده قائم من زمان سرا.. القانون ده عايز يحفظ حق اللي باع و اللي اشترى. و لازال القانون ده مسبب أزمة مابين الناس و الحكومة والشيوخ.. حيث أنه موضوع خلافي و اختلف فيه رأي الكثير من العلماء والشيوخ.
و السؤال هنا هل تقبل أنك تبيع أعضائك حيا أو ميتا تبعا للقانون الجديد؟
قالت سارة نور الدين _ طالبة بكلية اعلام:" ابيعها؟ لا طبعا اتبرع بيها اه برضايا ومعرفتي و اختياري.. انما بيع لا. أولا لاني مش مالكة هذا الجسد وكوني استغله للتربح ده في نظري هاعاقب عليه يوم الحساب.. وثانيا لاني المفروض اساعد المحتاج مش هاروح كمان اسعر الكبد و الكلى واحط سعر لقلبي لما اموت".

و قال لنا اسلام عبد المجيد_ 17 سنة:" لو أنا حي أرفض أننا أبيع اعضائي لو حصل ايه.. لكن ح أوافق أننا لو مت أهلي يبيعوا أعضائي و أهي منها أن حد غيري يستفيد و منها أن أهلي يأخدوا فلوس و يستنفعوا."

أما سارة غنيم _ 21 سنة:" أنا ممكن أبيعها على حسب حاجة الانسان اللي قدامي.. بس برده بعد ما اموت مش لما اكون حية .."

و كان من الرافضين لهذا الموضوع داليا فاخر_21 سنة_ التي قالت:" انا ممكن اتبرع بيها حية او ميته لكن مش أبيعها خالص."

و وافقتها الرأي ياسمين محمد_20 سنة:" لا مش ح ابيعها طبعا لا حية ولا ميتة.. لأن الاعضاء دي مش ملكي دي ملك اللي خلقها."
و قال مصطفى محمود_26 سنة:" ممكن ابيعها لو ح تحقق لي الربح المادي اللي أنا محتاجه.. بس ده طبعا لو كانت أعضاء ممكن استغنى عنها زي الكلية مثلا.. لكن بعد ما اموت ممكن أخلي أهلي يتبرعوا بيها كصدقة جارية على روحي."
و تعترض سالي محمود_20سنة قائلة:" مش هقبل خالص ابيع .. ممكن اتبرع ولو اتبرعت هتبرع وانا حية لكن لو مت خلاص مينفعش الجسد فى التراب والروح عند ربنا ازاى اتصرف فى شىء مش بتاعى بعد موتى."

وتضيف أميرة عاطف_20 سنة:" أنا ممكن أتبرع بعد موتي.. لكن أبيع أعضائي لا.. ده غير اني ح اتبرع بالاعضاء اللي جوا جسمي مش من بره. يعني ممكن قلبي أو الكبد.. لكن مش العين مثلا."
ويقول مروان حاتم_ طالب بكلية العلوم:" أنا مش فاهم انتم ليه معقدين الدنيا كدة.. و لو مثلا أنا العيان و عايز عضو ممكن ادفع كل ما أملك عشان العضو ده.. فيها إيه لو أنا أعطيت للمريض ده جزء مني و أمل تاني في الحياة .. و في مقابل ده هو كمان ح يديني امل تاني في الحياة بفلوسه. لكن بعد موتي أنا أرفض أن اهلي يتصرفوا في جسدي و يستفيدوا منه.. الأحسن أننا أدفن كامل."
أما منة مصطفى_ 20 سنة فترى استحالة القيام بعملية البيع:"مش ممكن ابيعها طبعا.. لأنها مش ملكي ملك اللي خلقها.. ده غير انه رأي خلافي أختلف عليه الشيوخ ففي منهم بيقول انه حرام و فيه منهم بيقول أنه حلال.. و الله أعلم".
مينا منير_ 23 سنة:" و الناس الغلبانة تموت؟ يعني انا كدة بادي الأعضاء و الدم والعلاج و الأجهزة الطبية و الدكاترة الممتازين للأغنياء.. حتى لما ييجي حد يموت أو حتى و هو عايش يديهم كمان.. مافيش حاجة من غير مقابل أبدا للناس الغلابة.. ثم ده اتجار بالجسد و في نظري زيه زي البنت اللي بتبيع شرفها و جسدها.. بل وألعن

ياترى
انتم رايكم ايه
هتبيعوا ولا لألألألألألألألألألألألألأ

نيبع ايه خلاص مش باقي غير لحمنا نبيع فيه
لا طبعا الموضع ده مرفوض تمام
واكيد الجزارين الي بيشتغلوا في الموضوع ده
حسابهم عسير
بس انت دلوقت خلتني افكر لو واحد صحبي هييموت ومحتاج كليا مثلا
انا هقدر اديهالو هو ده السؤال
انا بجد مش عارف نفسي اقدر اضحي لحد فين
الخلاصه
الدنيا بقت حاجه تانيه وربنا
يسترنا لحد اخر عمرنا
يارب من غير مفاجات

بص هوا لو بيعى هينقذ ازمه
على اساس التبرع بالاعضاء زى الكليه كدا
الحاجه الى اقدر اعيش من غيرها
هيحل مشكله او مصيبه فش مشكله
بالنسبه للتبرع انا ممكن اتبرع بس الى هوا حد يكون يهمنى اوى
الى هوا لو واحد ه صاحبتى صاحبتى
مش صاحبتى اى كلام وخلاص
الى هى امى بعد الشر عليها طبعا
وطبعا الناس الى بحبهم اوى
بعد مااموت ان شاء الله
ممكن بقى ساعتها
بس تبقى تبرع مش متاجره وتبقى لجهه مضمونه انها هتدى حد فقير ومحتاج مش هتتاجر بيبها

بجد موضوع محييييير
بس اكيد طبعا كلنا متفقين
على التبرع مش البيع

ارخص حاجة فى بلادنا الانسان

لا حول ولا قوة الا بالله

كل شى يغلى الا الانسان

شكرا ياحمددد

لالالالالالالالا
يافلله على فكرة
الانسان بيغلى طبعا
دلوقتى لاعضاء اسعارها
فى السماااااااااااا
يعنى لو الواحد جمع الكلى والقلب والعين
هيلاقى نفسه مليونير وهوه مش حاسس
وشكرا على مرورك