بابا مضايقك ..ماما مزعلاكى..طيب ايه الحل؟؟؟؟؟

بابا مضايقك؟ ماما مزعلاكي؟ خلاص من النهارده كل الكلام ده هيتغير، عرض خاص جداً ولمدة محدودة من شركة (فاميلكو) دلوقتي تقدر تختار أهلك علي مزاجك، إيه مش مصدق؟ لأ بجد لازم تصدق، دلوقتي تقدر تبعت لنا كل المواصفات اللي نفسك تشوفها في والدك أو والدتك وبعد أسبوع يتم التبديل، ولو طلبت تغيير الإتنين هتاخد عليهم أخ أو أخت هدية من اختيارك، يللا مستني إيه قوم بسرعة اتصل على .....0900".
هااااه... إيه رأيك؟ أكيد بكره هنلاقي كتير واقفين في طوابير مستنيين دورهم عشان يحجزوا، تفتكر العرض ده لو كان بجد كنت قدمت؟
أنا متأكد إن ناس كتير قوي ممكن يجاوبوا بلأ بس لو كان قدامهم الفرصة دي كانوا هيقدموا وهيحاولوا على قد ما يقدروا إنهم يغيروا أهلهم.
طيب إيه رأيك بقي إن العرض ده فعلاً موجود، ومش بس موجود ده موجود من غير حجز ولا غيره، والشركة مقرها الرئيسي عنوانه هو عقلك.
لأ ما تفهمنيش غلط إحنا هنا مش هنناقش ولا هنحكى في كلام سمعته قبل كده كتير، الموضوع إني جاى أبيع لك منتج ومش عاوز منك غير خمس دقايق... بس قبل ما أبتدى أحكي لك عن المنتج، لازم الأول نتفق إنك هتدينى فرصة وتجرب المنتج بتاعي وما تحكمش عليه من غير ما تجربه، موافق؟
الموضوع بكل بساطة بيتقسم لـ 3 أجزاء:
الجزء الأول، وهو تحب أهلك الجداد يبقوا عاملين أزاي؟
الجزء التاني، طريقة التبديل
الجزء التالت و الأخير، هو ميعاد الاستلام و الصيانة.
نبتدي بالجزء الأول وهو إجابة للسؤال؛ إيه هي المواصفات اللي نفسك تبقى موجودة في باباك و مامتك؟ دي يا سيدي قايمة بالمواصفات اللي ممكن تتوفر فيهم :
1.يكونوا بيحبوك
2.لما تحتاجهم دايماً تلاقيهم
3.لا يقولوا لك رايح فين و لا جاى منين
4.يعملوا لك كل اللي إنت نفسك فيه
5.يبقوا بيخافوا عليك
6.ما يتدخلوش في حياتك و لا قراراتك
7.يدولك حرية كاملة في المواضيع اللي تتكلم فيها معاهم أو قدامهم
8.يحترموا وجودك و ما يستهتروش بأفكارك
أعتقد دول أهم الحاجات اللي تحب تكون في باباك ومامتك
طيب الجزء التاني وهو إزاي إحنا هنبدل أهلك ونديلك عيلة جديدة علي مزاجك. الموضوع سهل وبسيط جداً، دلوقتي لو بصينا علي الحاجات اللي نفسك تبقى موجودة في باباك ومامتك هنلاقي مثلا:
إن موضوع إنهم يكونوا بيحبوك دي سهلة جداً لأنها أصلاً كانت موجودة عند باباك ومامتك القدام.
سيبك من دي لو شفنا حكاية إنك لو احتجت لهم هتلاقيهم، طيب ما برده دي موجودة عند القدام، لأ.... صدقني موجودة، طيب إزاي إنت قاعد دلوقتي على النت عارف تقرا المكتوب، لما احتجت إنهم يأكلوك ويشربوك ويعلموك ويفهموك ويدولك حاجة تخليك قادر تعرف عن أي حاجة في أي حتة،
طيب مش ممكن تكون إنت السبب إنهم في الحاجات التانية الصغيرة دي مش واقفين جانبك؟ رحت حكيت لهم عن مشكلتك؟ طيب وأنت رايح تحكى بصيت ولو ثانية هو أو هي كانوا عاملين إزاي؟ متضايقين ولا متعصبين؟ أو يمكن عندهم شغل كتير فعشان كده ما ردوش عليك؟ جربت تروح لهم مرة تانية؟
وحكاية إنك عاوزهم يخافوا عليك وفي نفس الوقت ما يسألوش فيك، طب دي نعملها إزاي دي؟ ما هو معنى إنهم يخافوا عليك إنهم لو إتأخرت يكلموك يطمنوا عليك، مش لازم يعنى يكون معناه تصغيرك قدام صحابك.
فاضل حكاية إنهم ما يتدخلوش في حياتك ولا قراراتك، وفي نفس الوقت يسمعوك ويحترموا كلامك وأفكارك، لما إنت عاوزهم يا أخي يسمعوك ويحترموا أفكارك، طيب ما تقول لهم إنت بتفكر أزاي في حياتك ومستقبلك. مرة إنت تقنعهم ومرة هما يقنعوك، وفي نفس الوقت هما كمان ثقتهم فيك هتزيد قوى والمواضيع اللي ممكن تتكلموا فيها هتزيد جداً فتبقوا أهل وكمان أصحاب وحبايب.
أما موضوع يعملوا لك كل اللي نفسك فيه أكيد من حقك إنك يبقى ليك طلبات وواجب عليهم إنهم يعملوها لك بس برضه ما تنساش وأنت بتطلب النهارده أحسن جزمة وأحسن موبايل إنك بتاخد من رصيد بكره اللي هتطلب بيه أحسن عربية وأحلى شقة، وما تنساش والدك ووالدتك جت لهم الفلوس إزاي، هي تقريباً بالظبط شبه إزاي إنت بتنجح في الامتحانات، أيام و ليالي طويلة كلها مذاكرة و تعب، تحس بإيه إنت لما تعبك ده تلاقيه مرمى في الزبالة ولا مُهمل كده في أي حتة ولا حد مقدر إنت تعبت قد إيه.
على فكرة ، أنا مش عاوزك تفتكر إني معاهم ضدك... لأ ... أنا لا معاهم ضدك ولا أنا معاك ضدهم، أصلها مش حرب، أكيد برضه هما فيهم عيوب.
بص إحنا بنتكلم بصراحة برا بقى موضوع المنتج بتاعي ده، إنت عارف ليه أنا مش عارف أقول لهم عيوبهم؟ عشان أنا ما عنديش حتة أكتب لهم فيها، مممم... طب إيه رأيك بدل ما تقعد تستني لحد لما حد يقول لهم على لسانك إيه العيوب اللي بسببها عاوز تغيرهم روح إنت إعمل كده، وورينا بقى يا عم مهارتك في الإقناع وإزاي هتعرف تقول رأيك بصراحة من غير ما يبقى كلامك بيضايقهم أو يستفزهم.
بلاش إعمل إعلان زى بتاعي ده ليهم وقول لهم لو كان في عرض إنكم تغيروني هتشتروا العرض ده؟ وقول لهم إنك اشتريت من عندي أوعى توديهم لشركة تانية.
جينا بقى يا سيدي لآخر جزء، بتاع ميعاد التسليم والصيانة، الميعاد ده هيبقى في نفس اللحظة اللي إنت رحت تكلمهم فيها و تفتح معاهم صفحة جديدة وتبتدى تبيع لهم العرض زي ما اتفقنا، أما الصيانة بقى فا دي عكس أي جهاز تانى، الصيانة في أول شهرين مهمة جداً،
يعنى لازم تروح تكلمهم في أي حاجة في الفترة الأولانية دي، كلم والدك في الكورة، كلمي والدتك في الموضة، أقعدي مع والدك ساعة في اليوم وأسمعوا عبد الحليم، أقعد مع والدتك ساعة في اليوم تقول لها إزاي إن كل الستات الوقت بيكبرهم وهى الوقت بيصغرها، وصدقني كل ما تقلل الحواجز اللي بينك وبينهم من ناحيتك هيحصل نفس الموضوع من ناحيتهم.
على فكرة "البضاعة المباعة لا ترد ولا تستبدل"...
للفاشل صفتان، لا يسمع سوى نفسه، ولا يسمعه أحداً سواه

جميل اوى موضوعك يا سايتو احنا فعلا محتاجين الحاجه الى زى دى الى تقلل الفجوه الى مابين الاهل

ميرسى ادمن لمرورك
نورتى الموضوع

عن تجربه شخصيه
انا كان فى مسافه كبيره اوى بينى وبين ماما
يمكن المسسافه دى قلت اليومين دول
ويمكن فهمت اخيرا ان كل الى كانت بتقولوا كان صح
وانا الى كانت دماغى متركبه شمال
ويمكن لانى فعلا بدات اعمل الى انت قولتوا اى نعم احيانا بتتعصب عليا بس احنا بردو لازم نستحمل
لانهم كدااو كدا والدينا ومالناش غيرهم فى الدنيا
ولازم نتحملهم
لما بتحمل لما هى بتتعصب عليا هى نفسها الى بتيجى تصالحنى
لكن لما انا بستهبل وبتنرفز طبعا بخسر كل شئ وحتى ان كنت ان مش غلطانه بتقلب طبعا الموضوع ضدي وابى انا الى غلطانه
عارف هى اهم حاجه ان احنا نعرف بس ان هما بنيادمين مش ملايكه
من حقهم يغلطوا ومن حقهم علينا ان احنا نستحملهم زى ماهما بيستحملون كتير ا
الوضوع ان علقت عليه قبل كدا
وبجد موضوع رائع وربنا يهدينا اجمعين يارب

الموضوع بجد هايل

و دي فرصة للوقفة مع النفس . فعلا اقد اية تعبهم فينا و مجهودهم طول السنين ما يتعوضش بس اللي يقدر

و عايزة اقولكوا يا جماعة انة الوالدين دول نعمة كبيرة جدا من عند ربنا

انا قريت قبل كدة في بريد الجمعة قصص ناس قد اية بتتحسر علي فقدان سواء الاب او الام قبل ما يأدوا الواجب اللي عليهم او حتي يردوا و لو جزء من مشوار الكفاح و العرق و الشقا

يا رب يكون الموضوع ده محفز لناس كتير في انها تاخد خطوة لقدام مش لوره

ميرسى ادمن لمرورك
وزى ما انتى قولتى لازم نكون عارفين انهم بشر مش ملايكة
انا فعلا عارف كده بس للاسف
انا علاقتى ببابا احسن كتير من ماما
بيفهمنى اكتر
ساعات بتخنق بس برده مش بنفس الدرجة اللى لما بكون مخنوق من حاجة تبع ماما
اتمنى انا نفسى اعمل زى ما مكتوب
واتمنى علاقتى بماما تتحسن شوية
وعلاقة ببابا تزيد عن دلوقتى
وعلى فكرة ياجماعة الموضوع منقووووووووووووووووووول
وميرسى ادمن كمان مرة لمرورك

ميرسى مها لمرورك
وكلامك صح طبعا مليون المية
الواحد مش بيعرف قيمة الحاجة اللى معاه غير لما بتضيع منه
انا مرة قريت حديث عن الرسول عليه الصلاة والسلام
بيقول فيما معناه
اذا ماتت الام نادى مناد من قبل السماء
يابن ادم لقد ماتت من كنا نكرمك من اجلها فاعمل عملا صالحا نكرمك من اجله
صدق رسول الله صلى الله عليه وسلم
ويارب زى ما انتى قلتى الموضوع ده يكون خطوة لقدام مش لورا
وميرسى كمان مرة لمرورك مها

انا شايف ان الوالدين مهما بيختلفو معانا بيكون همهم فى الاول وفى الاخر مصلحتنا ولازم نقدر دا حتى لو كان تفكيرهم مختلف معايا وعمرهم ما بيمنعوك عن حاجة لغرض السيطرة ولا فرض الذات ولكن كل همهم مصلحتك

ميرسى مصطفى لمرورك
وكلامك برده صح
بس انا شايف انه لازم يكون فى قدر من الحرية
والنقاش
يعنى حتى لو بيمنعوك من حاجة
من اقل حقوقك انك تعرف ليه؟؟؟؟؟؟

انا معاك ان من ابسط حقوقك انك تعرف هما بيمنعوك ليه واحيانا بيكون رايهم مش صح لكن لازم ناخد فى عين الاعتبار انهم غرضهم وفى نيتهم مصلحتك حتى لو كان رايهم غلط

أولا شكرا يا سايتو عالموضوع الجميل ده
ثانيا يا جماعه عاوزه اقولكو ان بعد الوالدين مفيش
تقدر تقولى مين بيخاف عليك اكتر من الاب والام؟؟
طبعا مفيش
اقرب مثال حصل من قريب
مين اول ما قالوا النتيجه هتظهر كان قلقان
والله ماما بتبقى قلقانه عالنتيجه زى ما يكون نتيجتها
ومين اول ما بتحصلك مشكله بتلجأله
أكيد الاب والام
هتقول صحابى هرجع اقولك مش زى الوالدين
ويا ريت يا جماعه كل واحد مننا يحاول يقرب منهم انا عن نفسى
بدأت اخد الخطوه دى
وانا بوصى الولاد علشان هما اكتر ناس بيعملوا مشاكل مع الوالدين
انهم يقربوا منهم ويبقوا صحاب
ميرسي عالموضوع

ميرسى عاشقة الالسن لمرورك
بس انا عايز اقول
ان مفيش حد مختلف على ان الاب والام لو عملوا حاجة بيكون قصدهم فى الاول والاخر مصلحتنا
حتى ولو الحاجة اللى عملوها فى نظرنا احنا غلط
بس محدش بيخاف علينا ولا بيحبنا فى الدنيا كلها قد الاب والام
دى غريزة ودى حاجة بديهية
بس انا هنا بتكلم عن الحاجات اللى بتزعلنا من بابا وماما
وبفترض لو فى شراء لاب وام بالتقسيط المريح
وبقارن
ليه وايه المواصفات اللى عايزينها
ولما ندور هنلاقيها كلها موجودة
بس محتاجين تعامل خاص
محتاجين ننسى اللى فات ونبدأمن جديد
محتاجين نصلح نفسناالاول
وبعدين نصلح علاقتنا مع الاب والام
وخلص الكلام
وميرسى ليكى على مرورك الجميل

لا انا عاجبني بابا وماما
شكرا ليك

هههههههههههههههههههه
ميرسى ليكى نايل على المرور
بس كنا نحب انك تشاركينا رأيك

اولا : بشكرك علي الموضوع الرائع دة
ثانيا : بالنسبة ليا انا فأنا بابا اقربلي من ماما لأن ماما عصبية شوية و بتخاف عليا جدا
و خوفها دة بيخليها مش تقدر تفهمني قد بابا اللي بيفهمني و يتحاور معايا من غير عصبية
بس انا نفسي بابا يبطل طيبة مع الناس اللي ميستهلوش
ناس يبقي بابا طيب جدا معاهم و هو عارف انهم ميستهلوش و في الاخر بيعملوله مشاكل
و مش بيقدرو طيبته معاهم
بس انا بحاول بردو اقرب من ماما اكتر بس برجع اميل لبابا تاني
و بحكي معاه اكتر من ماما و بحكي من غير ما اخاف انه يتعصب
انا بردو بحكي مع ماما بس لازم يكون الوقت مناسب و تكون رايقة
و بردو ممكن تتعصب
بس بابا دايما وقته مناسب و عمره ما اتعصب عليا

و بشكرك مرة تاني يا سايتو

ربنا يديمها عليكى نعمة ايجيبت
ولعلمك انا زيك بالظبط
متفاهم مع بابا ومفيش زرة تفاهم واحدة مع ماما
تعرفى لو انا وهى رقنا كده شوية
ادينا بالظبط نص ساعه
لا ن صدى كتير شوية
قولى ربع
وتلاقى النرفزة اشتغلت تانى
سواء منى او منها
بس املى كبير فى ان علاقتى بيها تبقى زى علاقتى مع بابا
انا مش بقول انى مش بحبها ودايما بنتخانق
بالعكس
انا بحبها جدا
بس المشكلة انى مش ينفع اقولها كده
علشان جو التوتر اللى مابينا على طول
هى مش مقتنعة انى دللوقتى 20سنة
لى حاجات كده خاصة بتاعتى انا بس فى دماغى
يعنى ممكن اقول شطحات تفكير
كل حاجة عايزاها زى ماهى بتفكر مش زى ما انا بفكر
بس ربنا يهدى
وميرسى ليكى ايجيبت على المرور

و الله يا سايتو الواحد مش عارف يعمل اية

انا ممكن جدا مخليهاش تتعصب و امتص غضبها

و خلاص و تبقي علاقتنا كدة باردة من غير حديث و حوار

بس انا نفسي انا و ماما نبقي اصحاب و عشان نبقي كدة

مش ينفع انا اسكت و مش اوضح وجة نظري

بس في الاخر الواحد بيقول كتر خيرهم معانا و كفاية تعبهم معانا

بس لو يبطلو عصبية شوية

و ليك مني كل الشكر سايتو

يارب يبطلوا ايجيبت وميرسى لمرورك

والله كلام جمييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييل
ورااااااااااااااااااااااااااااااااااااااااااااااااااااااااااااااااااااااااااااااااااااااااااااائع
وبدييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييع
بس مالك انت يابو صلاح حالك اتغير كده ايه التقي اللي نزل عليك ده انا كده اخاف منك
ههههههههههههههههههههههههههههههههههههههههههههههههههههههههه
بس تسلم ايدك كلام حلو مع اني مش فاهم انت عايز ايه

اوعي تغير المحطه

ههههههههههههههههههههههه
مرورك عسل يا شحاته
بس لعلمك انا طول عمرى كده
بس انت اللى مش جت فرصة واتعرفت بيا اكتر شوية
ويا سيدى ولا تخاف ولا حاجة
كلنا فى الهوى سوا
انا قلت انفع الناس شوية بدل ما الواحد قاعد ملوش لزمة
هههههههههههههههه
واللى عايزه يا سيدى
دا اعلان عن شركة اسمها فاميلكو
للى يحب يغير ابوم وامه
ويشترى اب وام جداد وبالتقسيط المريح
ومستنى زيارتك فى المكتب علشان نناقش باقى التفاصيل وطرق السداد
ههههههههههههههههههههههههههههههه
ميرسى كتير ليك احمد على مرورك
نورت الموضوع

بصراحة كلام جامد جدااااااااااااااااااااااا وجميل جدااااااااااااااا
انا كمان زيى زلاى اى شاب تانى مفيش علاقة ود بينى وبين والديا بس
اهو يمكن ابتدت تتحسن شوية وترجع تانى لذيذة زى زمان
ميرسى يا سايتو على مواضيعك الجمدة دى
بجد مواضيع مهمة جدااااااااا

ميرسى بيكهام لمرورك الجميل
منور مواضيعى يا باشا