ياسر ويسريه قصه حب عصريه

النهارده جايبلكوا قصه من واقع الحياه المصريه مع أضافه بعض روح الفكاهه والمرح بناقش فيها قضايا كتير زي الفقر والفراغ والاختلاف الكبير بين طبقات المجتمع ولكن بشكل كوميدي ..

أحداث القصه من واقع الخيال والخيال ما هو الا سيناريو

***
يوم جميل والشمس طالعه (وحرقت قفا الغلابه) انما سي ياسر يا سلام يا سلام يا سلام ياسر ده شاب كلاس اوي وفافي (فرفور يعني قولوا متتكسفوش) من عيله ارستقراطيه من بتوع رد كلبي وفي يوم من ذات الايام وفي مره من ذات المرامير ياسر يقابل اللي هتغيرله كل حياته ونرجع بظهرنا لورا لليوم التاريخي

ياسر صحى الصبح زي اي بنى ادم وضرب الكابوتشينو وضرب الجيل في شعره وضرب مفاتيحه (عالم مفتريه ربنا عالظالم) ونزل عشان يخرج مع هشام صاحبه ويروشنوا (ربنا يروشهم زي ما هم رواشنا )

هشام:صباح حاير طاير عالي المقامات جاي من جميع الاتجاهات يصبح على احلى البهوات

ياسر:ايه يا ابني الكلام ده كله بتجيبه منين

هشام:من عبده حركات

ياسر:وات(يعني ايه بس بالاسباني ربنا يكفيكوا شر الجهل)

هشام:انت لسه هتوتوت ده بقى معرفه اخوك حاجه كده معفنه ولوكال موت(بيئه يعني بعيد عن السامعين)بنروح نغير جو عنده بدل الخلق النضيفه اللي بنشوفها كل يوم

ياسر:وااااو دي فكره جامده مووووت مش كنت تديني الو من زمان

هشام:خلاص يا كبو انا هروحله بكره اخد عنده حصه تشرد تيجي معايا

ياسر:اوفكورز (يعني طبعا كسفتونا ادام الاجانب)

هشام:لا ابوس ايدك بلاش تعليمك الاجنبي وحصص الاسباني بتاعتك دي تنقح عليك واحنا هناك احسن يتفكرك بتشتمه وساعتها مش هتلحق حتى تصوت بالهيروغليفي

ياسر:ولا يهزك بكره تشوف شاب من العشوائيات واقف معاك دوس انت بس وحددلنا معاد معاه

هشام:بيس يا مان نتقابل بكره افترنون (بعد الضحا في الآياله )ونروحله سوا

ياسر:بيس يا كبو سي يو

*******

ياسر:لازم اوطي على الموبايل واحب على ايده عشان ترد

هشام:سوري يا مان كنت باخد شاور عشان ننزل

ياسر:شاور........ وبتقول انا اللي هفضحك هناك يلا يا عم النضيف خلصنا

هشام:اما نشوف مين هيفضح مين

ياسر: طيب يلا عاوزين نلحق معادنا

هشام:انا لسه هلبس اقولك روح انت اسبقني على هناك وانا هحصلك

ياسر:اسبقك فين معرفش الادريس(الخريطه يا بني ادمين)

هشام:لا استناني انت عند الميدان وانا هجيلك ونروح توجزر( مع بعضياتنا)

ياسر:لا اوصفلي انت العنوان وانا هروح ده انت معاك ياسو على سن ورمح

هشام:طيب حاسب السن يتكسر وتضيع هيبتك يا سيد الرجاله بص انت هتسأل على حاره بسطاويسي الدهل وتمشي كده على طول على طول

ياسر:لحد ما تلاقي عماره دي وصفه سهله دي وصفه هايله

هشام:هيهيهيهيههي ايه الليله الكبيره اللي انت عايش فيها دي هوديك انا يا عم اللذيذ وخلصني

ياسر:لا خلاص انا هروح وهسأل على حاره بسطاويسي العبيط صح ؟؟

هشام:ههههههههههههه والله ما عبيط غيرك يا ابني الدهل مش العبيط

ياسر:يا عم كلهم من عيله المتخلف تربيه السرايا السفرا يلا سي يو زير(اشوفك هناك انا هاخد حق الترجمه في الاخر)

هشام: اوك سي يو

ويركب ياسر عربيته ويروح العنوان اللي وصفهوله ويقف عند أول الحاره مش عارف يروح فين ولا ييجي منين وملبوخ(فرفور يا جماعه حاولوا تقدروا الموقف)

ويقرر انه يطلع البطل اللي جواه وينزل من العربيه يسال اي مخلوق من اللي في الحاره عن عبده حركات
وينزل ياسر من العربيه والكل عمال يتفرج عليه كأنه من كوكو تاني شاب نضيف وريحته حلوه وشكله مستحمي قريب يعني خرج عن سلو بلدنا وماسك في ايده البتاع اللي اسمه النوبايل لدرجه انهم شكوا انه الريس بس متنكر ما هي مش بعيده عليه يعمل اي حاجه ده.............تيت............... (حذفت بواسطه الرقابه)مكنش حد راضي يقرب منه ولا يكلمه لحد ما شاف بنت على اد ما باين عليها الفقر وعلامات التشرد الا انها جميله والرقه باينه في ملامحها وحب يفرد عضلاته ويعمل جو لنفسه وراح يسالها عن عبده حركات و...........................

يُتـــــــــــــــ ياسر ويسريه ـــــــــــــــــبع

" الفصل التاني "
***
ويدخل ياسر على الانسه الحسناء وهو بيسبل وفاكر نفسه في الزمالك ميعرفش هنا ان اللي يبص للبت من دول لابد وحتما يكتب كتابه عليها امال ايه هو لعب عيال دي هتبقى مبصوص فيها ونعمل زوم على ياسر وحسناء الحاره..
ياسر: احم احم لو سمحتي يا انسه .....
يسريه"بتبصله من فوق لتحت": خير يا حيلتها تايه ولا ايه يا توتو يا صغير
ياسر: توتو ههههههههه عسل يو ار سو كيوت (عقبال عند الحبايب يعني دمك خفيف)
يسريه: والنبي عسل انت هتستظرف يا سيد أمك
ياسر: (وهو بيسبل بردو) سوري مكنتش اعرف اني هزعلك اوي كده
يسريه"بفراغ صبر": مانت باين عليك بلسان ونص وبتشتم وليلتك زرقا كاروهات .. سوري ..أمال مكنش سوري ليه لما ضربت بؤك في الخلاط وأتكلمت ..
ياسر: لا لو ممكن بينك مقلم بالطول
يسريه: الله ده انت لذيذ وبتتكلم أهو .. قصر يا بن مامتك وقول عايز ايه شكلك نضيف مش عايزه ابهدلك

ياسر: خلاص انتي النرف عندك عالي ليه انا عايز اسال عن عبده اشتغالات عبده مقالب حاجه كده..
يسريه: عبده حركااااااااات تقصد.. في آخر الشارع جتكوا البله بليتوا البلد
ياسر: جرى ايه يا انسه هو انتي عشان شايفاني جنتل مان ومش راضي ارد على قله ادبك دي تقومي تتمادي
يسريه: قله ادبىىىىىىىىىىىى نعم أنت فاكر نفسك واقع مع بت بجد لا يا واااااااااااد ده أنا أعملك فار وأخلي قطط الحاره تجري ورااااااااااك

((وتبتدي وصله الصويط))
يااااااااااااااااالهوووووووووووووووي
الحقوووووووووووووووووووني
ياسر: اييه ايه يا ست انتي ده
يسريه: الواد الملزق ده بيعاكسني.. " وبصوت واطي " .. ده انت هتاخد علقه مخدهاش حرامي فراخ في عشه
ياسر: (وهو متعلق من قفاه زي خروف العيد بعد ما دبحوه من جزار الحته) وات؟؟!!! انا مجتش جنب فراخ والله يا اونكل ولا بحبها اصلا
وطبعا خد العلقه المتينه ومقدرش يروح غير لعبده التمرجي (ادي اخره اللي يمشي ورا عبده حركات)

_مشهد المستشفى _

ياسر وهو في المستشفى ومش باينله ملامح من علقه ست الحسن والجمال كلم وليد عشان ييجيله

هشام: الله الله ايه يا كبو اللي هزقك كده وخللي وشك شوارع
ياسر: شوارع اشوف فيك ويك بحاله هاتولي باباااااااااا هاتولي بابااااااااااااااا
هشام: يا حلو يا نايتي بابا ايه يا ياسو ما تهدي الجو احنا في المستشف ي هتفضحنا عيب علي طولك
ياسر: امشي من ادااااااامي انا غلطان اني بعرف واحد زيك انا كان مالي ومال عبده زفت بتاعك ده

(هشام جاي يقعد) ياسر: اااااااااااه قووووووووم من على رجلي جبتولي اعاقه وانا لسه زوغير
هشام: طب أهدي اهدي يا واد وأحكيلي مين عمل فيك كده بلدوزر عدي عليك؟!
ياسر: يااااااااااريت كنت قلت قضاء وقدر بس اما اشوفها بس اكله الاسفلت دي والله ما هسيب حقي
هشام: ياخبر ملون هي أنثي بني آدم اللي عملت فيك كده ولا أنثي حوت
ياسر: بس متقولش انثى دي مش انثى دي مكنه شتايم بلدوزر تهزيق موتور فضايح.. رحت اسالها عالزفت عبده هباب بتاعك ده لمت عليا الشارع واخر حاجه فاكرها كانت الفراخ وانا ما بحبش الفرااااااااااااااااااخ
هشام: ههههههههههههههه بزمتك برزالتك المعهوده معاكستش كده ولا كده مرمتش كلمه يا فلانتينو
ياسر: فلانتينو ما خلالالالالاص انا ضعت مستقبلي المعاكساتي راااااح هعاكس بأنهي وش دلوقتي ضيعت مستقبلي
هشام: اه يبقي عاكست يا نايتي بزمتك يا أبو عين زايغه دي بنات تتعاكس ده ريحه البصل سابقاهم بمتر تعلن عن وصولهم
ياسر: انا اعاكس المستوى ده انت حد ضربك على يور هيد قلتلك غلطت غلطه عمري و سالتها على عبده مقصات
هشام: مقصات ايه انت مقعدينك في مشرحه ولا ايه عبده حركات حركات
ياسر: كان يوم اسود يوم ما سمعت الاسم ده وكان يوم اسود منه لما عرفتك
هشام: خلاص هددي نفسك وعقاب البت دي معايا
ياسر: لالالالا ده تاري انا وحياه سوسو وتوتو وميمي اللي دوختهم ورايا وحياه صافي وكوكي اللي جبتهم برمش وحياه شاهي وبوسي وحياه كل اسم دخل في قاموس ياسو ما هسيب حقي ابدا
وبعدين انا مش عايز اعرفك تاني اصلا امشى من ادامىىىىىىىى
هشام: همشي ماشي وتليفونات بقي
ياسر: انت هتسيبني هنا و هشااااااااااااااااااااااااام
هشام: رنات يا ياااااااااسو
ياسر: هشاااااااااااااااااااااااااااااااااااااااااااااام

وطبعا مشي ولا عبره ( موسيقي التتر )

يُتـــــ ياسر ويسريه ــــــــبع

عايز الردود يا جماعة علشان أكمل

هههههههههههههههههههههههه
يوميات طريفه
وتم التثبيت

_________________

ههههههههههههه
جميلة اوى
thanksssssss

very nice
thanks DuNkeLmAnN

الفصل التالت

وتروح يسريه عند جارتهم فتحيه عشان تفضفض معاها بكلمتين

تك تك تك

فتحيه : ميييين طيب ياللي عالباب جايه اهو حاضر يوه..

يسريه!! ازيك كنت لسه هجيلك ادخلي يا حبيبتي

يسريه: ازيك يا موكوسه .. لسه متجوزتيش؟!

فتحيه : يختي ما الحال من بعضه

بلا جواز بلا نيله

يسريه : خلاص يا بت هتخشيلي قافيه ولا ايه .. علي رأيك..
انما انتي كنتي هتسعدينا بوشك السمح ده ليه خير؟!

فتحيه: ال ايه يختي عرفت انك كنتي بتتخانقي النهارده قلت اجي اطمن عليكي واعرف ايه اللي حصلهو ايه اللي حصل يا بت ؟

يسريه: جاتكوا هم حاره غم مبتبلش في بؤوكوا خبر.. مفيش.. واد نايتي من بتوع الجامعه حبيب أمه عاكسني ربيته

فتحيه :اتنيلي هو انتي حد بيبص في وشك يوه.. قصدي ما تسيبيه يعاكس يعملك منظر

يسريه: لا بيبصوا في وشك انتي يا أم 3 ودان ليه قرعه زيك انا يا بت ولا ايه؟

فتحيه: خلاص هو انتي مقدرتيش عالنايتي هتتشطري عالشمعدان

يسريه: أيوه كده اتعدلي المهم يعني

فتحيه: المهم يا بتاعه المهم

يسريه : علقوه شبه الفرخه اللي عندها انفلونزا الطيور ونقلوه المستشفي

فتحيه : يا ضنايا يا ابني يا بت يا خايبه مش تتنصحي ولا هتفضلي طول عمرك زي الوابور كده تهبي وخلاص حد بيعاكس جريه عالبيت مش عالمستشفي

يسريه: يابت بقولك نايتي وبعدين الاشكال دي مش بتعاتنا أرضي بقليلك وأقبلي بالواد سيكا الميكانيكي مش هتلاقي حد يبص في خلقتك

فتحيه: بقولك ايه يا ميكا ايه اللي جاب سيره سيكا دلوقتي وبعدين نايتي نايتي عاجباكي يعني الخلق اللي بنشوفها كل يوم خلق متربه موضتها بطلت من القرن اللي فات

يسريه : فضك م السيره دي وناوليني شويه رز ده انتي بت فاضيه

فتحيه : هو انا ما اشوفش خلقتك الا عشان تستلفي مننا رز عندك الرز في المطبخ على الله يتمر

يسريه: بتزليني يا فتحيه علي شويه الرز الله يرحم لما .......

فتحيه: خلاص خلاص يوه بضحك معاكي عندك الرز جوه خدي اللي انتي عايزاه بس ما تكتريش اوي حاكم انا عارفاكي مش ابو بلاش كتر منه

يسريه : كاتك نيله وأنتي بت فقر اوعي من قدامي يلا سلام يا حجه أم فتحيه

أمي بتسلم عليكي وبتقولك لما تعوزي حاجه ابقي أطلبيها من جارتك اللي تحت

متتعبيش نفسك وتنزلي سلام

فتحيه : سلام

بلا نيله جيران هم(( طبعاً بصوت واطي والا كانت هتبقي مجزه ))

طبعاً عايزين تعرفوا ياسر فين ومدبرله أيه

أستنونا الحلقه اللي جايه مع ياسر ويسريه
يُتــــــــــــ ياسرويسريه بــــع

قصة جامده
عايزين الكمالة
وشكراً للمجهود

شكراً للردود يا جماعة
وانتظروا الكمالة بعد الردود

7lwaaaaa mooooooot ya yasser .... bas ya reeeeeeeeet tkmlha bsor3aaaa ....

((الفصل الرابع))

ويرجع ياسر بيتهم وهو مجروح الكرامه مشرأب العينين وقرر انه ينتقم من أكله لحوم الضفادع اللي بهدلته البهدله دي وهو سرحان وبيتخيل انه بيضربها مقص حراميه او حاططها مع اسد احول مراته بتشبشبله كل يوم وجتله عقده نفيسه في قفصه فيدخل عليه هشام

هشام:ايه يا كبو اللي واخد يور مايند
ياسر:انا مش قلت مش عايز اشوفك تاني انت السبب انت اللي قتلت باباتي ااااه يا باباتي
هشام:ايه يا ابني هو انت مقدرتش عالدونكي هتتشطر علي اسمه ايه ده (قصده البردعه بس بعيد عنكوا ميعرفهاش)
ياسر:انامشفتش دونكي غيرك

هشام:ما قلتليش بردو سرحان في مين يا كبير
ياسر:بخطط للانتقام
هشام:ايه امير الانتقام اللي انت عايش فيه ده وعاوز تنتقم من مين
ياسر:من فرانكشتين الحاره اللي بهدلتني البهدله دي كلها

هشام:انت لسه بردو مصمم طب خدني جنبك بقى نفكر سوا

ياسر:تصدق انك معندكش اي بلود قوم مش عايز اشوف وشك تاني

هشام:ليه يا ياسو كده ده انا هجهزلك خطه ولا خطه توم كروز في ميشن ايمبوسيبل شفته ده حته فيلم جاااااامد كيك شفته لما ......
ياسر:بسسسسسس انت اللي ايمبوسيبل ان حد يستحملك خلينا نركز في خطتك
هشام:بص يا سيدي احنا .................................................. ..

ـــــــ في الحاره ــــــــ

بلطجي1: يا جميل ياللي مدوخني وراك ايه الجمال ده ده ولا جمال عبد الناصر يا حلو ولا حلاوه الرشيدي الميزان يا قمر ياللي مغلبني
يسريه: أهااااااااااا هو انت من أيام السنما الصامته ده انت زودتها أوي
بلطجي1: كله منك حلو يا جميل
يسريه: احترم نفسك يا واد هقطعك وربنا
بلطجي 2: طب تعالي معانا يا جميل وأحنا نروقوك
بلطجي1: ما تسمع الكلام بقى ما تتعبناش معاك

يسريه: ياااااااااا نااااااااااس هو مفيش راجل في الحته دي يحوش عني القطرين دول

ياااا نااااااااااس الحقووووووووني

ويظهر ياسر ولا سوبر مان في زمانه (يختي عليه وعلى حواليه)

ياسر: جرى ايه يا نايتي انت وهو ايه مفيش حد مالي عينكم ولا ايه حد فيهم عملك حاجه يا انسه

بلطجي2: انت مين يا جدع انت

ياسر: انا اللي هيربيك

بلطجي1: تربي مين يا سيد الحبايب ده أنا أعملك شاورما وأحطك في عيش معفن

ياسر: يبقى لسه متعرفنيش واللي ميعرفنش يجهلنيش عارف الخمسه اللي طاروا في حادثه المترو كنت انا بس المترو طلع مجدع وشالها بدالي (الكلمتين اللي لقطهم من الافلام الهندي بتاعتنا)
بلطجي1: بقولك ايه مبحبش طوله اللسان عندك حاجه أستعملها
طاااااااااااخ طراااااااااخ وطبعاً اداهم العلقه التمام ماهم متأجرين منه ..

ياسر (ولا احمد رمزي في زمانه): انتي كويسه يا .......

يسريه: يسريه أسمي يسريه
ياسر: اهلا وسهلا
يسريه: وانت اسمك ايه بقي ان شاء الله؟
ياسر: انا اسمي ياسر شفتي الصدف السعيده

يسريه: سعيده علي نفسها مش عليا
ياسر: انتي كويسه اهم حاجه

يسريه: اه كويسه انت شايف ايه ولا البعيد اعمى و ان كان علي القطرين اللي انت ضربتهم أنا كان ممكن أعملهم ساندوتشات كوفته بس أنت مواعيدك زباله اساسا
ياسر: اه ما هو باين امال مين اللي صوت والحقوني ومفيش حد يحوش عني هي دي شكرا بتاعتك يعني مش كفايه اتعورت وكنت هروح فيها

يسريه: انت اتعورت جامد؟ (وهي بتضغط عالتعويره) مش جامد دي شويه دم يعني

ياسر: اااااه ايه ده خفي شويه .. متشكر اوي يا انسه يسريه .. عالعموم كويس انك بخير والمره الجايه هبقى اظبط مواعيدي

يسريه: آه ياريت لأنك بتتأخر أوي يلا سلام

ياسر(وهو ماسك يسريه وبيوقفها): ايه يا انسه يسريه ليه المعامله دي على فكره انا ما غلطتش فيكي انا كان كل قصدي اني اساعدك وانا اسف لو ضايقتك

يسريه : بس بس بس بس بس متخشش علينا بطقمين الحنيه دول مبياكلوش معايا بتعب من السهوكه بتجبلي حساسيه

ياسر: وات سهوكه ؟؟!! عالعموم سلامتك من الحساسيه

يسريه: بقولك ايه اتكلم عدل واقف معووج وكانك بتكلم واحد صاحبك
ياسر: اول حاجه صح تقوليها من ساعه ما شفت يور فيس انا حاسس فعلا اني بكلم واحد صاحبي بس صاحب لوكال
يسريه: شكلك بتغلط بس أنت أصلا كلك علي بعضك غلط جت في الكلمه دي

ياسر: الله الله لا انتي غريبه جدا على فكره (بس بردو مش هسيبك في سره )

يسريه : محمد رسول الله يا خويا يلزمشي خدمه أديك تمن اللزقه بتاعت الأوفه يا أمور

ياسر: ولو اني مش فاهم بس مرسي
يسريه: سيبني أمشي بقي وبلاش علقه المره اللي فاتت
ياسر: لا وعلى ايه الطيب احسن سي يو سون ماي فير لادي
يسريه: تك نيله فيك وف علامك واللي علموك "في سرها" جوض نايط يا نايتي

ياسر:جود نايت دارلنج خدي بالك من نفسك وبلاش تمشي في الوقت المتأخر ده لوحدك بطلي لف في الشوارع
يسريه: خد بالك علي نفسك يا شاطر ليقلعوك هدومك وتاخد برد

ومشيت يسريه وأكيد ياسر ناويلها نيه تانيه .. يا تري ايه ؟!

_________________

يوميات جامده موووووووووووووت Laughing

منتظرين الكماله

هههههههههههههههههههههههههههههه
الله عليك
استمر
بس اوعي تغير المحطه

eh ya gma3a fen el rdoooooooooooooooooood

زي الفل يا ماااااااااااااااااااان
كمل وانت هتشوف الردود