كلام.. كلام شباب.. كلام م الشباب.. كلام للشباب..
كلام مهواش عن السياسة ولا الاقتصاد ولا حتى الثقافة، كلام عن الشباب.. شباب مصر، وقبل ما نتكلم خلينا نضرب تعظيم سلام لشباب مصر إللي أنا واحد منهم. واحد م الشباب دول اتعلمت ولسه هدور على شغل وكنت طبعا عاوز وظيفة ف نفس مجال دراستي- صحيح تأتي الرياح بما لا تشتهي السفن- لكن هشتغل وهفكر بعد كده مع نفسي وهسأل، طب وبعد الشغل هتجوز؟ وبعد الجواز عيال؟ طب وبعد العيال؟!!
بص كده للسقف- بنظره فلسفيه نفسيه معقدة- وفكر شويه وشوف عاوز إيه يا ابن الناس وانتي يا بنت الحلال وانتم حرين لو عاوزين تمشوا م الدنيا زي ما جيتوها اقلبوا الصفحه وشوفلكم حاجه تانيه تعملكم دماغ، ولو عاوزين تبقالكم لازمه بجد يعني ..... خليكوا معايا لما نشوف آخرة إللي أنا بكتبه ده؟!!
المهم: هعمل إيه؟ ولمين؟
خلونا صُرحى مع بعض كده من أولها ونتكلم علي بلاطة يعني ونقول إن احنا لما كنا بنذاكر ف المدرسة والكلية كنا بنعمل كده عشان بابا وماما ميزعلوش م النتيجة آخر السنة وزي ما بيقولو كده عشان يتمنظروا بينا قدام أهلهم وأصحابهم، وبعد ما اتخرجنا بقينا بندور على شغل عشان نقبض مرتب ونجهز نفسنا عشان نتجوز وبعد كده نصرف الفلوس ع العيال ومفيش مانع برضه ندلع نفسنا شويه ونقضيها خروجات ومشتروات وسهرات، بس يا ترى إحنا بنعمل كل ده مره عشان أهلنا ومره عشان نفسنا ومره عشان ولادنا، لكن مفكرناش كده هنعمل إمتى حاجه عشان بلدنا؟!! مره عشان مصر؟!!
هتقولي هنعمل إيه؟ بص يا سيدي فيه حاجه اسمها "منظمات المجتمع المدني" أو خلينا نبسطها ونقول "الجمعيات الأهلية" واللي يمكن تكون جنب بيتك وانت مش عارف، المهم إن الجمعيات ديه بتحاول تساعد في إنها تحل مشاكل مصر لإنها بلدهم ولإن فيها ناس عاوزين يعملوا حاجه بجد ويسيبوا حاجه كويسه وراهم الناس تفتكرهم بيها. طب بيعملوا إزاي ده؟ بيكون عندهم مشاريع كده بتحاول تساعد مثلا إنها تعالج مشكلة أطفال الشوراع أو تساعد الفقرا إن وضعهم المادي يتحسن أو تعلم الناس الأميين بحيث إن ده لما يتعمل أكيد الناس دي هتقدر ده هي كمان وتعمل حاجه للبلد لإنها زي ما لقوا إللي مد لهم إيده هم كمان هيمدوا إيدهم لناس تانية وتالتة لحد ما ما نكون كلنا كويسين وبلدنا زي ما إحنا عايزين- فهمت يا سيدي؟!!
وبالتالي ممكن تروح تتطوع في أي جمعية من "الجمعيات الأهلية" ديه وتعمل حاجه لبلدك وبيتهيألي إنك لما تتطوع بجزء من وقتك أو مجهودك مش هيبقى كتير ع البلد يعني أو هييجي عليك بخسارة بدل ما الوقت كله ضايع في حاجات زي العدة ف النت كافيه أو تقليب قنوات التليفزيون، وبعدين انتم ف كل الأحول هتستفيدوا، وتعالوا أقولكم إزاي:
? هتحسوا إن ليكم لازمه في الدنيا وإنكم بتعملوا حاجه واحده مش ليكم لأ لربنا ولبلدنا كمان، وده أكيد هيحسسكم إنكم سعدا لإن النهارده مبقاش زي امبارح ولإن كل يوم فيه جديد وانت بتشارك فيه وبتساعد ناس محتاجة.
? لإنكم هتتعرفوا على ناس وهيبقى ليكم أصحاب جداد ويمكن تقدروا تعملوا علاقات مع ناس مهمين يقدروا يساعدوكم في شغل مثلا أو حتى سفر بره للدراسة.
? لإنكم هتتعلموا حاجات جديدة ليها علاقة بالشغل من خلال فترة التطوع والتدريب والاحتكاك بناس عندها خبرة.
مطبات؛
أكيد هتلاقي ناس من حزب أعداء النجاح هتقولك تطوع إيه بس سيبك منهم اعتبرهم م العصر الحجري... لأ والخشبي كمان لإنهم مش عارفين إنك لما بتتطوع مش بس بتفيد بلدك لأ وبتطور نفسك سواء ف اللغة أو المهارات الشخصية وبتتعلم حاجات جديدة يمكن أفيد م اللي خدته ف الجامعة (واسأل مجرب)، أكيد مش هتلاقي نفسك اتغيرت بين يوم وليلة وبقيت حد جامد وتعرف ناس مهمين بس زي ما انت عارف إن كل حاجه ف أولها صعبة، ويمكن كمان ناس تحاول توقفك وتقولك بلاش لعب العيال ده بس عاوز أقولك إن ده لازم يكون حاجة تحمسك إنك تتمسك بموقفك وتُصر ع اللي ف دماغك مش عِند لكن تحدي لنفسك ولكل الناس إللي حواليك تثبت بيه إنك تقدر تعمل حاجه لبلدك و لنفسك ف نفس الوقت.
وافتكر دايماً إن حياة كل واحد فينا عامله زي شريط السكة الحديد وإننا احنا م الاخر يعني عاملين زي القطر ف الدنيا ديه وبنمشي على الشريط ده، فياترى إنت عاوز آخر محطة ليك تكون فين؟ فكر كويس ولما تعرف المحطة إرسم شريط السكة الحديد اللي هتمشي عليه عشان يوصلك لمحطتك..... وقولي يمكن اركب معاك؟!!
ويا ريت الناس ترد وتتفاعل واللى عنده خبرة معينة ممكن يفيدنا بيها
موضوع: كلام للشباب .....كلام فى المقيد 
الأحد 11 مايو 2008, 08:07
