قالولي بتحب مصر فقلت مش عارف

قالولي بتحب مصر فقلت مش عارف

المعنى كعبة وانا بوفد الحروف طايف

وألف مغزل قصايد في الإدين لافف

قالولي بتحب مصر فقلت مش عارف

أنا لما اشوف مصر ع الصفحة بكون خايف

ما يجيش في بالي هرم ما يجيش في بالي نيل

ما يجيش في بالي غيطان خضرا وشمس أصيل

ولا جزوع فلاحين لو يعدلوها تميل

حكم الليالي ياخدهم في الحصاد محاصيل

بيلبسوهم فراعنة ساعة التمثيل

وساعة الجد فيه سخرة وإسماعيل

ما يجيش في بالي عرابي ونظرته في الخيل

وسعد باشا وفريد وبقية التماثيل

ولا ام كلثوم في خمسانها ولا المنديل

الصبح في التاكسي صوتها مبوظه التسجيل

ما يجيش في بالي العبور وسفارة اسرائيل

ولا الحضارة اللي واجعة دماغنا جيل ورا جيل

قالولي بتحب مصر أخدني صمت طويل

وجت في بالي ابتسامة وانتهت بعويل

قالولي بتحب مصر فقلت مش عارف

لكني عارف بإني إبن رضوى عاشور

أمي اللتي حملها ما ينحسب بشهور

الحب في قلبها والحرب خيط مضفور

تصبر على الشمس تبرد والنجوم تدفى

ولو تسابق زمنها تسبقه ويحفى

تكتب في كار الأمومة م الكتب ألفين

طفلة تحمي الغزالة وتطعم العصفور

وتزنب الدهر لو يغلط بنظرة عين

وبنظرة أو طبطبة ترضى عليه فيدور

وأمي حافظة شوارع مصر بالسنتي

تقول لمصر يا حاجة ترد يابنتي

تقولها احكي لي فتقول ابدأي إنتي

وأمي حافظة السِيَر أصل السِيَر كارها

تكتب بحبر الليالي تقوم تنوَّرها

وتقول يا حاجة إذا ما فْرِحتي وحزِنتي

وفين ما كنتي أسجل ما أرى للناس

تفضل رسايل غرام للي يقدَّرها

أمي وأبويا التقوا والحرّ للحُرَّة

شاعر من الضفة برغوثي وإسمه مريد

قالولها ده أجنبي، ما يجوزش بالمرَّة

قالت لهم ياالعبيد اللي ملوكها عبيد

من إمتى كانت رام الله من بلاد برَّة

يا ناس يا أهل البلد شارياه وشاريني

من يعترض ع المحبة لما ربي يريد

كان الجواب إن واحد سافر اسرائيل

وانا أبويا قالوله يللا ع الترحيل

دلوقت جه دوري لاجل بلادي تنفيني

وتشيب أمي في عشرينها وعشريني

يا أهل مصر قولولي بس كام مرة

ها تعاقِبوها على حُبَّ الفلسطيني

قالولي بتحب مصر فقلت مش عارف

لا جيتها سايح ولا ني أعمى مش شايف

ريحة البخور في الغورية وألف حبل غسيل

وأيقونات تبكي لما تسمع التراتيل

كإن فيه حد يسقي كل لون فيها

تطرح سماحة على مر السنين وجمال

بيت السحيمي صدى للشاعر للقوال

خناقة فيها الزناتي يواجه ابن هلال

وان حلوة مرت وبانو شعرتين م الشال

الجوز يكونوا حجج للوصف في عنيها

وباب زويلة بيحوى من الكلاب أصناف

وباب زويلة عليه يتعلقوا الأشراف

وناس عبيد ناس وناس لؤلؤ بلا أصداف

بيوت قصايد وخانقاها بيوت الخلق

يا مصر ابنك في بطنك بس خانقاة خنق

وكل شاعر يطبطب له ويقول قرب

وراح صلاح وفؤاد والتونسي متغرب

لحد ما الحمل أصبح شغلة البطال

وكل شاعر عويل تلقيه في حملك قال

يا مصر بطنك بتكذب والا حملك حق

أحنا تعبنا ومافيش أشعار عشان نكتب

إبنك يا يجي يا تبقى الدنيا عايزة الحرق

قالولي بتحب مصر فقلت مش عارف

عزيزة القوم عزيزة تشتغل في بيوت

عشر سنين عمرها لكن حلال ع الموت

صبية تمشي تقع ويقولو حكم السن

وستها شعرها أصفر وكله بُكَل

كإنها مربية فيه اربعين كتكوت

ووشها زي وش الحاكم العربي

كإن خالقها راسمها على نَبُّوت

تحكم وقطر الندى تسمع لها وتئن

أصل البعيدة وَلِيِّة أمرها، عجبي

على الهوا بحجة الكسوة يقيموا له سور

قالولي بتحب مصر فقلت مش عارف

لا جيتها سايح ولاني أعمي مش شايف

شفت ام هاشم بترمي حجارة في الأزهر

وشفت اخوها الحسين وابنه على الأكبر

والقاسم بن الحسن نوارة العسكر

له أربعة وعشرة في السن مش أكتر

وشفت مولانا عباس ابن سيدنا علي

ماشي وجايب معاه القربة والراية

شاف اخته وولاد اخوه في الحرب عطشانين

والصهد خلى المطر جوة الغمامه غلي

حارب لحد الفرات وحده وملا القربة

قام العدى قطعوا كفوفه شمال ويمين

ومات في شط الفرات بين أهله وف غربة

من طيب ترابهم شواشي النخل تتعطر

وكل أهل العراق من ده التراب نابتين

يسقو العطاشى لكين بين اهلهم غربا

لوحدهم في الملمة وأهلهم ملايين

يا مراجع التواريخ يا مدرس الثنوي

المجزرة ف كربلا كت ليلة والا سنين

قوللي وإمتى وفاة آخر أمير أموي

وكل بيت في العراق من يومها بيت نبوي

وكل أهل العراق صاروا حسن وحسين

إتوضوا يا زايرين أصل العراق مصحف

مصحف وكل بني آدم هناك آية

أتوضو داللي على القرآن ما يتعرف

كافر لأن الصلاة لازم لها قراية

أتوض يا زايرين واتباركو بالأعتاب

ده كل حتة حجر من خلفها حكاية

دول اللي خلو اللغة فوق الحيطان لبلاب

منقوشة فوق الجوامع كل مبنى كتاب

شاعر رسم إسم محبوبته على المحراب

وشيخ في مدرسته ونجوم السما طلاب

أتوضو يا زايرين ده الخير في عتباته

ده راعي يرعى القصايد تحت نخلاته

ده المبتدأ والخبر متربيين عنده

بعد السفر في الكتب ييجوا هنا يباتو

يا مهر لا في جمال قده ولا ف عنده

في الحسن والحزن دايماً بالغ الغاية

والدهر طول عمره عاجز يعلى صهواته

وزينب الحرة حاضنه المهر بعباية

وشفتها جاية ترمي حجارة في الأزهر

وشفت اخوها الحسين وابنه علي الأكبر

وشوش في وسط المظاهرة أو صور بتفوت

يا إما همه يا إما ناس شبههم موت

والله والله كانو بيهتفوا معايا

إما ضحايا قنابل أو ضحايا سكوت

ومصر "واإسلاماه" محصورة في السينما

وكل "واإسلاماه" ما فيهاشي غير مظهر

الفرجة بالعدسات والعسكر الشنبر

حكام معاهم في كار الكلبشة علما

قالو لي بتحب مصر فقلت مش عارف

لا جيتها سايح ولاني أعمى مش شايف

يوم الخميس يوم بداية القصف في بغداد

فارت قدورنا بما فيها ولهبها زاد

الموت عروسة وخطابها عليها حراص

يا عسكر اضرب ويتسحسن بقى برصاص

زهقنا نبقي صفايح والزمن حداد

ما عدش فيه عذر يفضل حد عايش عاد

وان عيشنا وان متنا تبقى من الله فضلة خير

وصلوا من الجامعة للميدان بضرب وطحن

طلاب فراودة سقت مر الكاسات للأمن

ومرة من نفسه أصبح في الميدان تحرير

الشَّعر الابيض مشاعل نورها في الليل قاد

والشَّعر لاسود بيتعلم شغب أهله

وكل من كانو قبله في المشاغبة شداد

وكل شيخ قال شريط الذكريات كله

إللي حكى عن جنازة ربها ناصر

دول ستة مليون بيبكوا عالجمال الحر

ويقول بقت كل عطفة فمصر من بني مر

واللي حكى عن شيوعيين سنة سبعين

والاعتصام ليومين والأعتقال في الفجر

بيرموا م البوكس أوراق فيها إصحي يامصر

واللي على كل هم المسلمين أمنا

في كل ضربة عصاية يكسبوا حسنة

وفي الشجاعة النفر منهم بقى بملايين

أما أنا فأنا مش في السياسة متين

أطلع أنا والا أنزل خلقتي شاعر

لو قلت لي عيد قصصهم هابقى مش فاكر

تروح معارضة وحكومة وكل دول يمشوا

يكونوا ناس واعية أو ناس هبلة وانغشوا

تهشهم هجمة العسكر فينهشوا

أو يبعتوا للعساكر أكل يتعشوا

أو يقلبوها حروب وتسيل دماها بحور

مش ها بقى فاكر لكن فاكر في أخر اليوم

الضرب خلا الميدان دوامة بينا تدور

والناس بتجري ووراها العسكري بالشوم

بصيت أنا من وراكتفي وانا مذعور

لقيت في وسط الميدان لسه أمل واقف

قالولي بتحب مصر فقلت مش عارف

لاجيتها سايح ولا ني أعمى مش شايف

يا مصر كومة حروف، إِبَرِ المعاني فين

إِبَر بتجرح إيدينا قبل ما بتبان

نِسْرِك في بال السما بيقول حدودها منين

نسرك بياكله الصدا في بدلة السجان

يا أهل مصر اسمعوني واسمعو الباقيين

أن كنت انا رحلوني كلنا راحلين

يا أهل مصر يا أصحابي يا نور العين

يا شنطة المدرسة يا دفتر العناوين

يا ضغطة البنت بالكراسة ع النهدين

ترقص قصاد المراية، واحنا مش شايفين

يا صحن سلطان حسن يا صحن تمر وتين

يا ألف مدنا وجرس، لألف ملة ودين

يا أهل مصر اسمعوني، والكلام أمانات

قلتوالي بتحب مصر فقلت مش عارف

روحوا اسألوا مصر هيه عندها الإجابات
تميم البرغوثي، عمان، 1 ابريل 2003

حبيت اعرفكم بالشاعر الفلسطينى الرائع تميم البرغوثى هو فلسطينى من ام مصرية

وهو محاضر فى الجامعة الامريكية وكان بمسابقه
امير الشعراء على قناة ابو ظبى شعره رائع لو عجبكم

هنزلكم منه كتير انا بحبه جدا
اتمنى يعجبكم

اولا برافو فله
انا طبعا عارف تميم البرغوثي وشفتله اكثر من لقاء بالتلفزيون
في الفضائيات
وهو موهوب ورائع جدا وفلسطيني
بس احساسه المصري والعربي
غير عادي
وكلامه جميله وتعبيره اجمل ومن معجب بيه من اول كلمه قالها
وليه قصيده معروفه اوي والي اخد عنها المركز الاول في برنامج امير الشعراء
واسمها القدس
مفيش اروع من كده الراجل ده بيكنب من القلب للقلب

انا مستني منك كل الاعمال الي تقدري
تجبيها من كتابات تميم البرغوثي

شكرا جدا يا فله

انا مبسوطة جدا ياجرين

انى لاقيت الى هيسمعه ويقراله معايا

اوكى انا هجبلك الى اقدر عليه

قصيدة القدس انا سجلتها على الموبيل من روعتها

هحاول انزلها طبعا

شكرا ليك اتمنى تكون عجبتك القصيدة

اه طبعا القصيده تحفه
وانا سمعته وهو بيقراها وهو بيتكلم عن والدته
في برنامج العاشره مساء بعد فوزه بالمسابقه على طول
وكان اكثر من رائع وساعتها قررت اني اتابعه بس نسيت و اتشغلت
وجيتي انتي فكرتيني بيه
الف شكر ليكي
وهستنا قصايد تاني

كويس جدا ياجرين

هو شاعر عملاق رغم صغر سنه

وتحس انك قدام شاعر كبير فعلا

لان كلامه مؤثر جدا

شكرا مرة تانية لاهتمامك