انواع العشق...

عشقت الحب في معبد بنيته بروحي وكياني
وخليت الأمل راهب ملوش عندي أمل تاني
أنور شمعتي لغيري ونارها كاوية أحضاني
وأبيع روحي فدا روحي وأنا راضي بحرماني
وعشق الروح ملوش آخر لكن عشق الجسد فاني

من أغنية عاشق الروح لمحمد عبد الوهاب


فيه تلت أنواع للعشق
يمكن بيكون عندنا التلاته بنسب مختلفة
بس ديما فيه واحدة هي اللى مسيطرة

مهماش زي أي عشق عادي .. لأ
ده انت لما بتعرف اللى قدامك بيعشق من أي نوع
بتفهمه كويس جدا وتقدر تعرف بيعمل تصرفاته بأي دافع
وكمان تتوقع هو ممكن يعمل ايه
لأنك ببساطة عرفت الدوافع اللى بتحركه
إلا إن وارد برضه يخالف توقعاتك ,ومتعتبرش توقعاتك دي حتمية
لأن الإنسان لا يخضع للحتميات


أول عشق
عشق الروح ..و هو قمة السمو
ده حب كل ما هو باقي لا يفنى ..
حب للقيم وتقديس للمبادئ والأخلاق
حب مفيهوش رغبة ولا ينتظر مقابل
حب ينكر الإنسان فيه ذاته وبتكون آخر شيء بيفكر فيه
لكنه بهذا الحب بيكون أعز وأرفع إنسان في البشر

تاني عشق
عشق المادة .. و هو منتهى الدنو
الإنسان ربنا اصطفاه لأنه تميز بالعقل والقدرة على الاختيار
وعلى حسب اختياره ممكن يسمو لمنزلة الملائكة ويبقى أحسن منهم
وبإرادته ممكن يدنو لما هو أدني من منزلة الحيوانات

عشق الماديات عند البشر بيخليهم أسوأ من الحيوانات
لأن الحيوان بيشبع
لكن الإنسان مبيشبعش
وكل ما حصل على ماديات اتمنى يكون عنده أكتر
لحد ما يدمن الماديات
ويبقى عبد ذليل لها يبيع عشانها الحق والحب والأخلاق والمبادئ وأي شيء عشان يحصل عليها

تالت عشق
عشق الأنا .. وهو منتهى النرجسية والغرور
عاشق الأنا
بيعشق ما تعشقه نفسه
و النفس البشرية عينها فارغة وبتحب الماديات ومبتشبعش منها
وما يملاش عينها إلا التراب
بالإضافة لشيء مهم جدا
إن في البشر غريزة حب العظمة
الإنسان الطبيعي بيحب لنفسه الاحترام والرفعة
لما بيزيد ده بتكون دي نرجسية ولما بتقل ف حالة عشق المادة بتكون دي حيوانية
ومن هنا
عاشق الأنا بيبقى له قسط من القيم الروحية لأن فيها سمو مش هتحققهوله الماديات
لذلك عاشق الأنا ممكن يعمل أعمال كتير سامية ورفيعة
من هذا المنطلق
من منطلق حب الرفعة لنفسه .. مش عشق الروح
لعل النوع ده أصعب أنواع العشق التلاته وأكثرها تعقيدا

النوع التالت ده بقى بيفسرلك سيكولوجية كتير من أنواع البشر
اللى بتحتار هما ازاي بالطغيان ده وأي حاجه بتقف في طريق رغباتهم المادية بيسحقوها
وبيبعوا عشانها أي مبادئ أو قيم روحية أو أشخاص تتعارض مع رغبات الأنا
اللى هي معشوقتهم المقدسة
ومع ذلك تلاقي ليهم أعمال عظيمة و طموحات رفيعة المستوى
وأعمال في الخير والحب والإنسانية

الحالات المتقدمة من عشاق الأنا على اعبتارها مرض ومرض خبيث كمان
الحالات دي بتتحول إلى طغاة
مثال تطبيقي
شخصية صدام حسين
الطاغية الديكتاتور اللى كوارثه كبيرة
وفي نفس الوقت كان يهدف لوحدة الوطن العربي ونهضته وقوته
وبيحتضن العلماء وبيحترمهم و بيهتم بالدين والشريعة
بس اهتمام أي كلام كده ميعتبرش تدين
ومع إجرامه تلاقيه شخصية في منتهى القوة والعزة لا يُذَل ولا ينحني
وكان في منتهى الثبات والشجاعة في آخر لحظات حياته وأصعب لحظات حياته
عجيب هذا الصدام
ربنا يرحمه

إضافة كمان

يميز كل حالة من الحالات التلاته أن المعشوق بيكون في المنزلة الأعلى
يعني عاشق الروح .. الروح عنده أعلى من الأنا ومن المادة

عاشق المادة نفس الشيئ
ممكن يذل نفسه عشان المادة زي إهانة المدمن لنفسه بالظبط
وطبعا بايع الروحانيات دي خالص متجبش سيرتها

عاشق الأنا
المهم عنده ألا تهان نفسه
ممكن يبقى جشع وشره وشهواني ويبحث عن المادة بكل الوسائل
لكن ميقبلش الإهانة أو المذلة
ساعتها يسيب المادة ويجري على الروحانيات ويلجأ لله ويبقى العبد الصالح

.
..
.
..

يا ترى حد زهق مني ؟
سبحان الله مع إني متكلمتش كتير
طب كفاية كده انهارده